Мавсими ҷамъоварии ҳосили пахта дар ноҳияи Зафаробод оғоз гардид

ДУШАНБЕ, 01.09.2026 /АМИТ «Ховар»/. Дар ноҳияи Зафаробод ба ҷамъоварии пахта оғоз намуданд. Соли 2026 дар ноҳия беш аз 10 ҳазор гектар пунбадона кишт карда шуд. Деҳқонон ният доранд, ки аз заминҳои пахтазор зиёда аз 30 ҳазор тонна ҳосил ба даст оранд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.

Бо фарорасии мавсими ҷамъоварии пахта дар хоҷагиҳои деҳқонӣ ва кишоварзии ноҳия корҳои пахтачинӣ вусъат гирифта, саҳмдорон ва кормандони хоҷагиҳо ба ҷамъоварии ҳосил машғул мебошанд.

Таъкид гардид, ки фаровонии ҳосил ва сари вақт ҷамъоварӣ намудани он ба нишондиҳандаҳои соҳаи кишоварзӣ ва рушди иқтисоди ноҳия таъсири мусбат мерасонад.

Бо назардошти аҳамияти пахтакорӣ дар таъмини фаъолияти корхонаҳои коркарди пахта ва таъсиси ҷойи кор масъулин вазифадор гардиданд, ки барои ҷамъоварии пурра ва босифати ҳосил тадбирҳои зарурӣ андешанд.

Ёдовар мешавем, ки бо қарори Раиси вилояти Суғд Ситоди вилоятии ҳосил-2026 ташкил гардида, ташкилоту идора ва шаҳру ноҳияҳои пахтакор вазифадор шудаанд, ки ҳосилро беталаф ҷамъоварӣ намоянд.

АСК: Хадамоти матбуоти Раиси вилояти Суғд