Оид ба дастовардҳои илмии Тоҷикистон дар солҳои соҳибистиқлолӣ ҳамоиш доир шуд

ДУШАНБЕ, 04.09.2026 /АМИТ «Ховар»/. Дар Комиссияи олии аттестатсионии назди Президенти Ҷумҳурии Тоҷикистон ба ифтихори муқаддастарин ва бузургтарин ҷашни миллӣ — 35-солагии Истиқлоли давлатии Ҷумҳурии Тоҷикистон таҳти унвони «Истиқлоли давлатии Ҷумҳурии Тоҷикистон ва дастовардҳои он» ҳамоиш доир шуд. Дар ин хусус ба АМИТ «Ховар» аз Комиссияи олии аттестатсионӣ хабар доданд.

Иброз гардид, ки маҳз бо шарофати Истиқлоли давлатӣ ва дастгириҳои  роҳбарияти олии мамлакат илми ватанӣ, сиёсати аттестатсияи кадрҳои илмӣ ва илмӣ-педагогӣ ба марҳилаи нави рушд ворид гардида, заминаҳои устувори таҳқиқоти бунёдию амалӣ фароҳам оварда шудаанд.

Дар ин замина рушди минбаъдаи низоми тайёр намудани кадрҳои илмӣ ва илмӣ-педагогӣ яке аз самтҳои муҳими сиёсати давлатӣ ба ҳисоб рафта, ба баланд бардоштани сифати таҳқиқоти илмӣ, омодасозии мутахассисони баландихтисос ва таҳкими иқтидори илмии мамлакат мусоидат менамояд. Таваҷҷуҳи пайваста ба рушди муассисаҳои илмӣ, дастгирии олимони ҷавон, такмили низоми таҳсилоти баъдидипломӣ ва фароҳам овардани шароити мусоид барои анҷом додани таҳқиқоти илмӣ имконият фароҳам овардааст, ки илм ҳамчун омили муҳими пешрафти иқтисодию иҷтимоӣ ва рушди устувори ҷомеа нақши боз ҳам муассиртар пайдо намояд.

Инчунин иштирокчиёни ҳамоиш оид ба дастовардҳои солҳои соҳибистиқлолии мамлакат баён намуданд, ки дастовардҳои сиёсӣ, иқтисодӣ, иҷтимоӣ ва фарҳангии мамлакат давоми 35 соли охир маҳз натиҷаи афкори фарзона ва сиёсати бунёдкоронаи Пешвои миллат муҳтарам Эмомалӣ Раҳмон мебошанд. Ҳамин аст, ки имрӯз Тоҷикистонро дар арсаи байналмилалӣ ба сифати давлати ташаббускору сулҳхоҳ муаррифӣ намудаанд.

Озодӣ ва соҳибихтиёрӣ неъмати бебаҳоест, ки ҳифзи он масъулияти бузурги фарзандӣ ва ватандӯстиро аз ҳар шаҳрванди мамлакат, хусусан наслҳои ҷавон ва зиёиёни ҷомеа талаб менамояд.

Дар ҳамоиш ба як зумра намояндагони соҳаҳои гуногун шаҳодатномаҳо, инчунин, дипломҳои дараҷа ва унвонҳои илмӣ супорида шуданд.

АКС: Комиссияи олии аттестатсионии назди Президенти Ҷумҳурии Тоҷикистон