Раиси Палатаи ҳисоби Тоҷикистон дар машварати байналмилалӣ дар Чин иштирок намуд

ДУШАНБЕ, 05.09.2026 /АМИТ «Ховар»/. Дар Ҷумҳурии Мардумии Чин оид ба пешгирии биёбоншавӣ, ҳифзи муҳити зист ва аудити рушди устувор машварати байналмилалӣ баргузор шуд, ки дар он Раиси Палатаи ҳисоби Ҷумҳурии Тоҷикистон Ҷамшед Каримзода иштирок намуд.

Тавре АМИТ «Ховар» бо истинод ба шуъбаи иттилоот ва кор бо воситаҳои ахбори оммаи палата хабар медиҳад, дар ин чорабинии сатҳи байналмилалӣ намояндагони 20 ниҳоди олии аудити давлатҳои узви Созмони ҳамкории Шанхай ва давлатҳои Ховари Миёна иштирок карданд.

Дар машварат Ҷамшед Каримзода сухан намуда, таваҷҷуҳи иштирокчиёнро ба тағйирёбии иқлим, таназзули замин, коҳиши захираҳои об, обшавии пиряхҳо ва оқибатҳои хушкшавии баҳри Арал барои кишварҳои Осиёи Марказӣ, ки таҳдидҳои ҷиддии экологӣ ва иҷтимоию иқтисодӣ мебошанд, ҷалб намуд.

Таъкид гардид, ки обшавии пиряхҳо, таназзули замин ва норасоии об зарурати таҳкими тадбирҳои мутобиқшавӣ ва истифодаи самараноки захираҳои табииро ба миён меоранд.

Раиси Палатаи ҳисоб аҳаммияти гузариш аз аудити анъанавии молиявӣ ба аудити натиҷавии рушди устуворро таъкид намуда, иброз намуд, ки бояд на танҳо ҳаҷми маблағҳои харҷшуда, балки таъсири воқеии барномаҳои экологӣ ба муҳити зист ва зиндагии аҳолӣ арзёбӣ шавад.

Ҳамзамон дар чорабинӣ зарурати истифодаи технологияҳои муосир, аз ҷумла маълумоти моҳворавӣ, системаҳои иттилоотии ҷуғрофӣ ва зондкунии фосилавии Замин, барои баланд бардоштани самаранокии аудити экологӣ таъкид гардид.

Дар фарҷом ба таҳкими ҳамкории мақомоти олии аудити кишварҳои узви Созмони ҳамкории Шанхай, аз ҷумла гузаронидани аудитҳои муштарак, мубодилаи таҷриба ва ҳамоҳангсозии методологияҳои аудити экологӣ зарур ва саривақтӣ шуморида шуд.

Изҳор гардид, ки ҳамкории минтақавӣ барои ҳифзи захираҳои табиӣ ва таъмини рушди устувори Осиёи Марказӣ аҳаммияти муҳим ва калидӣ дорад.

АКС: Палатаи ҳисоби Ҷумҳурии Тоҷикистон