«РУШДИ ҲУҚУҚИ ИНСОН ДАР 35 СОЛИ СОҲИБИСТИҚЛОЛИИ ТОҶИКИСТОН». Таҳти ин унвон конференсияи байналмилалӣ доир шуд

ДУШАНБЕ, 02.09.2026 /АМИТ «Ховар»/. Имрӯз дар Китобхонаи миллии Тоҷикистон бахшида ба 35-солагии Истиқлолияти давлатӣ бо ташаббуси мақомоти Ваколатдор оид ба ҳуқуқи инсон дар Ҷумҳурии Тоҷикистон таҳти унвони «Рушди ҳуқуқи инсон дар 35 соли соҳибистиқлолии Тоҷикистон» конференсияи байналмилалӣ доир шуд. Дар ин хусус ба АМИТ «Ховар» аз мақомоти Ваколатдор хабар доданд.

Дар конференсия масъалаҳо оид ба нақши Истиқлолияти давлатӣ дар ташаккули низоми миллии ҳифзи ҳуқуқи инсон, такмили қонунгузорӣ, таҳкими фаъолияти мақомоти Ваколатдор оид ба ҳуқуқи инсон, ҳифзи ҳуқуқҳои кӯдак, инчунин нақши Пешвои миллат муҳтарам Эмомалӣ Раҳмон ҳамчун асосгузори ислоҳоти ҳуқуқӣ дар Тоҷикистони соҳибистиқлол ва Президенти Ҷумҳурии Тоҷикистон ҳамчун ҳомии ҳуқуқу озодиҳои инсон ва шаҳрванд мавриди баррасӣ қарор гирифтанд.

Иброз гардид, ки Истиқлолияти давлатии Ҷумҳурии Тоҷикистон барои ташаккул ва рушди низоми миллии ҳифзи ҳуқуқу озодиҳои инсон заминаи устувор фароҳам овард. Дар ин замина ислоҳоти пайвастаи ҳуқуқӣ ва такмили қонунгузории миллӣ амалӣ карда шуд. Таҳти роҳбарии Пешвои миллат муҳтарам Эмомалӣ Раҳмон ҳифзи ҳуқуқу озодиҳои инсон ва шаҳрванд яке аз самтҳои афзалиятноки сиёсати давлатӣ муайян гардида, барои таҳкими фаъолияти мақомоти Ваколатдор оид ба ҳуқуқи инсон, ҳифзи ҳуқуқҳои кӯдак ва баланд бардоштани маърифати ҳуқуқии ҷомеа тадбирҳои муассир андешида шуданд.

Зимни конференсия инчунин китоби мақомоти Ваколатдор оид ба ҳуқуқи инсон таҳти унвони «Дастовардҳои Ҷумҳурии Тоҷикистон дар соҳаи ҳуқуқи инсон дар даврони 35 соли соҳибистиқлолӣ» рӯнамоӣ гардид.

Дар китоб масъалаҳои марбут ба ташаккул ва таҳаввули низоми миллии ҳифзи ҳуқуқи инсон дар Ҷумҳурии Тоҷикистон мавриди таҳлили ҳамаҷониба қарор гирифта, дастовардҳои кишвар дар самти таъмини ҳуқуқҳои шаҳрвандӣ ва сиёсӣ, иқтисодӣ, иҷтимоӣ ва фарҳангӣ инъикос ёфтаанд. Ҳамзамон масъалаҳои таъмини баробарӣ ва пешгирии ҳама гуна табъиз, ҳифзи давлатии ҳуқуқу манфиатҳои истифодабарандагони хизматрасониҳои молиявӣ ва соҳибкорон, инчунин нақши Истиқлолияти давлатӣ дар таҳкими ҳуқуқҳои кӯдак баррасӣ гардиданд.

Гуфта шуд, ки ин китоб барои ҳуқуқшиносон, кормандони мақомоти давлатӣ, олимону муҳаққиқон, омӯзгорону донишҷӯён ва доираи васеи хонандагоне, ки ба масъалаҳои ҳуқуқи инсон таваҷҷуҳ доранд, тавсия дода мешавад.

Баргузории конференсия қадами муҳим дар самти омӯзиш ва таҳлили дастовардҳои Тоҷикистони соҳибистиқлол дар соҳаи ҳуқуқи инсон ва бозгӯйӣ намудани нақши Истиқлолияти давлатӣ дар таҳкими низоми миллии ҳифзи ҳуқуқу озодиҳои инсон маҳсуб мешавад.

АКС: Мақомоти Ваколатдор оид ба ҳуқуқи инсон дар Ҷумҳурии Тоҷикистон