Ҳайати Тоҷикистон дар Конфронси 31-уми тарафҳои Конвенсияи қолабии СММ оид ба тағйирёбии иқлим иштирок намуд

ДУШАНБЕ, 12.11.2026 /АМИТ «Ховар»/. Имрӯз дар шаҳри Анталияи Туркия ҳайати Ҷумҳурии Тоҷикистон таҳти роҳбарии муовини Сарвазири мамлакат Сулаймон Зиёзода дар Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим иштирок намуд. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.

Зимни суханронӣ таваҷҷуҳи хосса ба афзалиятҳои миллии Тоҷикистон дар рушди энергияи барқароршаванда, саноати сабз, инфрасохтори устувор ва васеъ кардани дастрасӣ ба маблағгузории иқлимӣ зоҳир карда шуд.

Таъкид гардид, ки сарфи назар аз саҳми кишвар дар партовҳои газҳои гулхонаӣ дар ҷаҳон, Тоҷикистон мунтазам чораҳоро барои коҳиш додани партовҳо ва гузариш ба иқтисоди камкарбон амалӣ мекунад. «Стратегияи рушди иқтисоди сабз барои солҳои 2023–2037» ва саҳми муайяншудаи он дар сатҳи миллӣ (NDC) асоси ин талошҳоро ташкил медиҳад.

Нақши пешбари Тоҷикистон дар рушди энергияи барқароршаванда махсусан таъкид карда шуд.

Иттилоъ дода шуд, ки айни замон, тақрибан 98 фоизи неруи барқи Тоҷикистон аз ҷониби неругоҳҳои барқи обӣ истеҳсол мешавад. Тибқи нақшаҳои миллӣ, интизор меравад, ки истеҳсоли неруи барқ ​​аз манбаъҳои барқароршаванда то соли 2035 ду баробар афзоиш ёбад ва истеҳсоли иловагии солонаи 20 миллиард киловатт-соат нерӯи барқи тоза таъмин карда шавад.

Иброз гардид, ки бо ташаббуси Тоҷикистон Созмони Милали Муттаҳид соли 2025-ро «Соли байналмилалии пиряхҳо» эълон кард ва қатънома доир ба «Даҳсолаи амал барои илми криосферӣ барои солҳои 2025-2034»-ро қабул намуд.

Аҳамияти Конфронси дарпешистодаи оби СММ дар соли 2028, ки дар шаҳри Душанбе баргузор мешавад, низ таъкид карда шуд. Аз ҷумла, изҳор гардид, ки соли 2026 Маҷмаи Умумии СММ қатъномаеро қабул кард, ки тартиб ва тафсилоти баргузории конфронсро муайян мекунад.

Дар хотима изҳори итминон карда шуд, ки тақвияти шарикии байналмилалӣ, масъулияти дастҷамъона ва иҷрои мунтазами уҳдадориҳои мавҷуда амалҳои иқлимии ҷаҳониро тақвият медиҳад, ноил шудан ба ҳадафҳои Созишномаи Парижро таъмин мекунад ва ба татбиқи Рӯзномаи рушди устувор барои соли 2030 мусоидат менамояд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон