Дар Павилиони миллии Тоҷикистон дар COP31 чорабинии минтақавӣ баргузор гардид

Ноябрь 20, 2026 14:33

ДУШАНБЕ, 20.11.2026 /АМИТ «Ховар»/. Дар доираи Конфронси 31-уми ҷонибҳои Конвенсияи қолабии Созмони Милали Муттаҳид оид ба тағйирёбии иқлим (COP31) дар Павилиони миллии Ҷумҳурии Тоҷикистон таҳти унвони «Аз хавфҳои марбут ба пиряхҳо то низомҳои устувори озуқаворӣ: сармоягузорӣ ба ҷомеаҳои кӯҳистон ва воситаҳои зиндагии устувор» чорабинии минтақавӣ баргузор гардид. Дар ин хусус ба АМИТ «Ховар» аз Кумитаи ҳифзи муҳити зисти назди Ҳукумати Ҷумҳурии Тоҷикистон хабар доданд.

Чорабинӣ ба баррасии таъсири тағйирёбии иқлим ба экосистемаҳои кӯҳӣ, амнияти озуқаворӣ ва воситаҳои зиндагии аҳолии деҳот, инчунин ҷалби сармоягузорӣ барои таҳкими устувории иқлимӣ равона гардид.

Иброз гардид, ки густариши ҳамкории байналмилалӣ, ҷалби маблағҳои грантӣ ва имтиёзнок, омода намудани лоиҳаҳои сармоягузории иқлимӣ ва татбиқи роҳҳалҳои амалӣ барои таҳкими устувории низомҳои озуқаворӣ муҳим мебошад. Зеро тағйирёбии иқлим ва босуръат об шудани пиряхҳо ба захираҳои об, истеҳсолоти кишоварзӣ ва рушди иҷтимоию иқтисодии минтақаҳои кӯҳистон таъсири ҷиддӣ мерасонанд.

Дар фарҷом ҷонибҳо барои таҳкими ҳамкории минбаъда ба хотири ҷалби сармоягузориҳои нав, татбиқи афзалияти миллии иқлимӣ ва фароҳам овардани имконияти устувори иқтисодию иҷтимоӣ барои аҳолии минтақаҳои кӯҳистон ибрози омодагӣ намуданд.

Ёдовар мешавем, ки аз шуруъ аз 9 ноябр дар шаҳри Анталияи Туркия Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим (COP31) идома дорад. Он имрӯз, 20 ноябр ба анҷом мерасад.

 АКС: Кумитаи ҳифзи муҳити зисти назди Ҳукумати Ҷумҳурии Тоҷикистон

Ноябрь 20, 2026 14:33

Хабарҳои дигари ин бахш

ПАРЧАМИ ТОҶИКИСТОН — РАМЗИ ОЗОДӢ, ШАРАФ ВА ИФТИХОРИ МИЛЛАТ. Мулоҳизаҳо дар ин маврид
Дар Душанбе ҳамкории молиявии байналмилалӣ баррасӣ шуд
Байни сохторҳои мониторинги молиявии Тоҷикистону Русия ду санади ҳамкорӣ ба имзо расид
Дар доираи COP31 Тоҷикистон, Умон ва Непал роҳҳои ҳалли мушкилоти обу иқлимро баррасӣ карданд
Соли 2027 дар гузаргоҳи гумрукии ноҳияи Спитамен сохтмон ва насби таҷҳизоти сканкунии борҳо оғоз мегардад
Ҷаласаи 45-уми пленарии Гурӯҳи Авруосиё ба таъмини амнияти иқтисодию молиявӣ мусоидат менамояд
Ҳайати Тоҷикистон дар чорабинии сатҳи баланди вазирони Осиёи Марказӣ оид ба тағйирёбии иқлим иштирок намуд
Дар Фурудгоҳи байналмилалии Душанбе беш аз 3,5 кило маснуоти тиллоӣ мусодира карда шуд
Фонди иқлими сабз барои рушди соҳаи тандурустии Тоҷикистон 2 миллион доллар ҷудо менамояд
Лоиҳаи «Барномаи нави саноатикунонии босуръати Тоҷикистон барои солҳои 2026-2030» таҳия гардидааст
Масъалаҳои баргузории Форуми B5+1 дар Душанбе баррасӣ шуданд
Тоҷикистон ба Конвенсияи СММ оид ба мубориза бо биёбоншавӣ пешниҳод намуд, ки соли 2027 миссияи техникӣ ташкил карда шавад