Дар шаҳри Панҷакент маркази хизматрасонӣ ва тарабхона ба истифода дода шуд

ДУШАНБЕ, 15.11.2026 /АМИТ «Ховар»/. Дар шаҳри Панҷакент корҳои ободониву созандагӣ ба истиқболи 40-солагии Истиқлоли давлатии Ҷумҳурии Тоҷикистон идома дошта, дар деҳаи Марғедари деҳоти ба номи Абуабдуллоҳи Рӯдакӣ маркази хизматрасонӣ ва тарабхонаи навбунёд ба истифода дода шуд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.

Иншоот аз ду ошёна иборат буда, барои баргузории чорабиниҳои фарҳангӣ низ пешбинӣ гардидааст. Баъди ба истифода додани он  10 сокини маҳаллӣ бо ҷойи кори доимӣ таъмин гардид. Ҳамчунин ба 20 нафар ятимони кулл, беш аз 20 нафар собиқадорони соҳаҳои гуногун, туҳфаҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон тақдим гардиданд.

Дар Тоҷикистон ба ҳифзи иҷтимоии гурӯҳҳои ниёзманди аҳолӣ, ба хусус ятимону бепарасторон таваҷҷуҳи хосса зоҳир мешавад. Таъмини шароити муносиб барои зиндагӣ, таҳсил ва фаъолияти ин қишри ҷомеа ҳамеша дар маркази таваҷҷуҳи давлату Ҳукумат қарор дорад.

Дар деҳаи Миндонаи Ҷамоати деҳоти Ёрӣ сохтмони фермаи парандапарварӣ, сардхона, нуқтаи забҳи чорво ва ҳавзи моҳипарварӣ, ки ба соҳибкор Муҳиддин Нарзиев тааллуқ доранд, идома дорад.

Ферма барои парвариши 60 ҳазор сар паранда пешбинӣ шуда, дар айни замон дар он тамоми хатҳои зарурии технологӣ васлу насб гардидаанд. Интизор меравад, ки рӯзҳои наздик чӯҷаҳо ворид ва  раванди парвариши паранда барои истеҳсоли гӯшт оғоз шавад.

Рушди парандапарварӣ ва таъсиси корхонаҳои истеҳсолию хизматрасонӣ дар таъмини бозори дохилӣ бо маҳсулоти ватанӣ, таъсиси ҷойи нави кор ва таҳкими амнияти озуқавории мамлакат нақши муҳим дорад.

 АКС: Хадамоти матбуоти Раиси вилояти Суғд