«ИЛМ — ФУРӮҒИ МАЪРИФАТ». 59 иштирокчии даври ниҳоии озмун қадрдонӣ карда шуданд

ДУШАНБЕ, 13.11.2026 /АМИТ «Ховар»/. 59 нафар иштирокчии даври ниҳоии Озмуни ҷумҳуриявии «Илм — фурӯғи маърифат», ки дар он сазовори ҷойҳои ифтихории чорум, панҷум ва шашум гардидаанд, бо мукофотпулӣ, «Ифтихорнома»-и Вазорати маориф ва илми Ҷумҳурии Тоҷикистон ва нишони «Илм ва инноватсия» қадрдонӣ карда шуданд. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Иброз гардид, ки роҳ ёфтан ба даври ниҳоии чунин озмуни бонуфуз ва соҳиб шудан ба ҷойҳои ифтихорӣ дастоварди назаррас буда, аз сатҳи дониш, қобилият ва иқтидори зеҳнии онҳо шаҳодат медиҳад.

Таъкид шуд, ки ин таҷриба барои фаъолияти минбаъдаи илмии онҳо заминаи мусоид фароҳам оварда, бо такмили дониш, омӯзиши пайваста ва талоши бештар дар озмунҳои минбаъда метавонанд ба дастовардҳои боз ҳам баландтар ноил гардида, сазовори ҷойҳои якум, дуюм ва сеюм шаванд.

Озмуни ҷумҳуриявии «Илм-фурӯғи маърифат» бо мақсади рушди тафаккури техникӣ, густариши ҷаҳонбинии илмӣ, ҷалби бештари қишрҳои ҷомеа ба омӯзиши илмҳои табиатшиносӣ, дақиқ ва риёзӣ, дастгирии ихтироъкориву навоварӣ ва дарёфти истеъдодҳои нав баргузор мегардад. Озмун ҳамчунин барои таҳкими мақоми илм дар ҷомеа ва пайвастани донишҳои назариявӣ бо талаботи амалии рушди мамлакат заминаи муҳим фароҳам меорад.

Яке аз ҳадафҳои асосии озмун на танҳо муайян намудани ғолибон, балки бедор намудани шавқу рағбати ҷавонон ба илм, ҳавасмандгардонии фаъолияти таҳқиқотӣ ва тарбияи насли нави олимону ихтироъкорон мебошад. Аз ин рӯ, иштирокчиён бояд таҷрибаи андӯхтаи худро самаранок истифода бурда, омӯзишу таҳқиқотро пайваста идома диҳанд.

Тибқи Низомномаи озмун, барои ҳавасмандгардонии иштирокчиёни фаъол ва дастгирии ҷавонони соҳибистеъдод якчанд  имтиёзу тадбирҳои ҳавасмандгардонӣ пешбинӣ гардидаанд, ки аз ҷумлаи онҳо қадрдонии махсуси иштирокчиёни ҷойҳои ифтихорӣ ва фароҳам овардани имконияти иловагӣ барои идомаи таҳсилу фаъолияти илмии ғолибон мебошад.

АКС: Маркази матбуоти Вазорати маориф ва илми Ҷумҳурии Тоҷикистон