Паҳлавонони тоҷик дар Чемпионати ҷаҳон оид ба кураш соҳиби шаш медал гардиданд

ДУШАНБЕ, 10.11.2026 /АМИТ «Ховар»/. Дастаи мунтахаби Тоҷикистон дар Чемпионати 15-уми ҷаҳон оид ба гӯштини кураш дар шаҳри Остонаи Ҷумҳурии Қазоқистон шаш медали ифтихорӣ — ду тилло, як нуқра ва се биринҷӣ ба даст овард. Дар рӯзи охирини мусобиқа варзишгари шинохтаи тоҷик Ҳақназар Назаров қаҳрамони ҷаҳон шуд ва Саидҷамол Алимардонов нишони биринҷӣ ба даст овард.

Баъди ба даст овардани чор медал дар рӯзи якуми мусобиқа паҳлавонони тоҷик дар рӯзи охирини ин рақобатҳо боз ду медал – як тилло ва як биринҷӣ ба даст оварданд. Ҳақназар Назаров дар вазни 90 кг бо пирӯзӣ бар Канан Мамадлӣ, намояндаи Озарбойҷон соҳиби унвони қаҳрамонӣ гардид.

Дар даври чорякниҳоӣ Ҳақназар Назаров бо паҳлавони ҳиндӣ Четан Капур рӯ ба рӯ шуда, ба ин рақибаш низ ғолиб омад. Ҳақназар Назаров марҳилаҳои минбаъдаи мусобиқаро низ муваффақона паси сар карда, ба даври ниҳоии мусобиқоти ҷаҳон роҳ ёфт. Дар рақобати ҳалкунанда ҳарифи ӯ Йиҳам Кемалов, намояндаи Туркманистон буд. Ҳақназар Назаров бар ӯ низ ғолиб омада, соҳиби медали тилло шуд ва дуюмин қаҳрамони ҷаҳон аз Тоҷикистон дар мусобиқаи Остона гардид.

Медали дигарро дар рӯзи охири мусобиқа Саидҷамол Алимардонов дар вазни 100 кг ба даст овард. Ӯ барандаи медали биринҷии мусобиқот шуд. Ёдрас мешавем, ки дар рӯзи якуми мусобиқа дастаи мунтахаби Тоҷикистон чор медали ифтихорӣ ба даст оварда буд. Медали нахустини тиллоро дар вазни 66 кг Сарвар Абдушукуров, варзишгари ҷавони тоҷик соҳиб шуд. Ӯ дар даври ниҳоӣ, аз ҷумла бар Руан Хандрӣ, намояндаи Африқои Ҷанубӣ пирӯз шуда, дар рақобати ҳалкунанда Баҳромбек Атоев, намояндаи Узбекистонро шикаст дод. Қаблан ӯ дар Бозиҳои Осиёӣ-2026 дар Ҷопон медали биринҷӣ ба даст оварда буд. Ҳақдод Гулов дар вазни 60 кг барандаи медали нуқраи қаҳрамонӣ шуд. Ӯ дар рақобати якум бар Завен Арзуманян, намояндаи Арманистон пирӯз шуда, сипас ба давраи ниҳоӣ роҳ ёфт. Ду медали биринҷиро дар рӯзи аввал Умар Шеров дар вазни 73 кг ва Наврӯз Каримзод дар вазни 81 кг ба даст оварданд.

Дар маҷмуъ, дастаи мунтахаби Тоҷикистонро дар чемпионати ҷаҳон ҳафт варзишгар намояндагӣ карданд. Ба ҳайати дастаи мунтахаби Тоҷикистон Ҳақдод Гулов дар вазни 60 кг, Сарвар Абдушукуров дар вазни 66 кг, Умар Шеров дар вазни 73 кг, Наврӯз Каримзод дар вазни 81 кг, Ҳақназар Назаров дар вазни 90 кг, Саидҷамол Алимардонов дар вазни 100 кг ва Фирдавс Насимов дар вазни 120 кг дохил буданд.

Аз рӯи натиҷаҳои чемпионати ҷаҳон дастаи мунтахаби Тоҷикистон бо шаш медали ифтихорӣ дар ҳисоби умумӣ ҷойи сеюмро гирифт.

Ғолиби мусобиқа дастаи мунтахаби Узбекистон гардид, ки нуҳ медали тилло, се нуқра ва як биринҷӣ ба даст овард. Дастаи мунтахаби Қазоқистон бо се медали тилло, шаш нуқра ва як биринҷӣ дар ҷойи дуюм қарор гирифт. Дастаи мунтахаби Эрон 13 медал ба даст овард, аммо аз рӯи шумораи медалҳои тилло аз дастаи мунтахаби Тоҷикистон қафо монд.

Бояд гуфт, ки кураш як навъи анъанавии гӯштин аст, ки дар он рақобатҳо дар ҳолати рост истодан баргузор мешаванд. Вазифаи асосии варзишгар иҷро кардани усули натиҷабахши ба замин партофтани ҳариф мебошад. Бар хилофи ҷудо ва самбо дар ин навъи гӯштин мубориза дар ҳолати хобида пешбинӣ нашудааст ва истифодаи усулҳои дардовар ва буғӣ кардан манъ аст.

Меҳрони ҚУРБОН,
шореҳи варзиши АМИТ «Ховар»

АКС аз манбаъҳои боз