Тоҷикистон ба Конвенсияи СММ оид ба мубориза бо биёбоншавӣ пешниҳод намуд, ки соли 2027 миссияи техникӣ ташкил карда шавад
ДУШАНБЕ, 18.11.2026 /АМИТ «Ховар»/. Соли 2027 ба Ҷумҳурии Тоҷикистон миссияи техникии Котиботи Конвенсияи Созмони Милали Муттаҳид оид ба мубориза бо биёбоншавӣ (UNCCD) барои муайян кардани самтҳои мушаххаси ҳамкорӣ, дастгирии коршиносон ва таҳияи механизмҳои амалӣ барои татбиқи ташаббусҳои миллӣ ва минтақавӣ ташкил карда шавад. Чунин пешниҳод намуд Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода зимни вохӯрӣ бо котиби иҷроияи ин конвенсия Ясмин Фуад.
Иброз гардид, ки татбиқи ин пешниҳодҳо ба тақвияти ҳамкории Тоҷикистон бо шарикони байналмилалӣ, ҷалби захираҳои иловагии молиявӣ ва техникӣ, ноил шудан ба ҳадафҳои миллӣ ва ҷаҳонӣ дар идоракунии устувори замин, мубориза бо биёбоншавӣ ва барқарорсозии экосистемаҳо мусоидат хоҳад кард.
Инчунин ҷонибҳо дурнамои ҳамкории минбаъдаро дар самти мубориза бо таназзули замин, барқарорсозии экосистемаҳои осебдида, идоракунии устувори захираҳои табиӣ ва тақвияти ҳамкории минтақавӣ дар Осиёи Марказӣ баррасӣ намуданд.
Ҳамзамон ба навсозии «Барномаи миллии амал оид ба мубориза бо биёбоншавӣ», ки соли 2001 қабул шудааст, диққати махсус дода шуд. Пешниҳод карда шуд, ки ин ҳуҷҷат бо Кодекси экологии Ҷумҳурии Тоҷикистон, афзалияти мутобиқшавӣ ба тағйирёбии иқлим ва уҳдадориҳои байналмилалии мамлакат оид ба ҳифзи гуногунии биологӣ мувофиқ гардонида шавад.
Таъкид гардид, ки татбиқи лоиҳаҳои муштараки фаромарзӣ бо Қирғизистон ва Узбекистон, ки ба барқарорсозии экосистемаҳои кӯҳӣ, чарогоҳҳои вайроншуда ва идоракунии устувори манзараҳои табиӣ, аз ҷумла дар водии Фарғона ва минтақаҳои кӯҳистонии ҳамшафати он нигаронида шудаанд, омӯхта шавад.
Тоҷикистон аз соли 1997 узви Конвенсияи Созмони Милали Муттаҳид оид ба мубориза бо биёбоншавӣ мебошад.
Ёдовар мешавем, ки аз 9 то 20 ноябр дар шаҳри Анталияи Туркия Конфронси 31-уми тарафҳои Конвенсияи қолабии Созмони Милали Муттаҳид оид ба тағйирёбии иқлим (COP31) баргузор мегардад. Вохӯрии ҷонибҳо дар доираи ҳамин конфронс баргузор гардид.
АКС: Кумитаи ҳифзи муҳити зисти назди Ҳукумати Ҷумҳурии Тоҷикистон








Лоиҳаи «Барномаи нави саноатикунонии босуръати Тоҷикистон барои солҳои 2026-2030» таҳия гардидааст
Масъалаҳои баргузории Форуми B5+1 дар Душанбе баррасӣ шуданд
Бо сабаби фаъолият накардани корхонаи «Хишти Тоҷикобод» сокинон ин масолеҳи сохтмониро аз Душанбе ва Ваҳдат бо роҳкирои гарон ворид менамоянд
Дар Минтақаи озоди иқтисодии «Ишкошим» ба маблағи беш аз 1 миллион сомонӣ кору хизматрасонӣ анҷом дода шуд
Дар доираи ҷаласаи 45-уми пленарии ГАО ҳамоиш баргузор гардид
Тоҷикистон барои мубориза бо тағйирёбии иқлим ва ҳифзи пиряхҳо иқдомҳои мушаххасро тақвият мебахшад
Душанбе мизбони конференсияи миллӣ ва Намоишгоҳи технологияҳои рақамӣ дар соҳаи кишоварзӣ мегардад
Тоҷикистон ва Озарбойҷон ҳамкориро дар соҳаи ҳифзи муҳити зист тақвият медиҳанд
Дар Душанбе ҷаласаи 45-уми пленарии ГАО оғоз шуд
Раванди татбиқи низоми электронии сертификатсияи фитосанитарӣ дар Тоҷикистон баррасӣ гардид
Ҳамкории Палатаи ҳисоби Тоҷикистон ва Додгоҳи ҳисоби Туркия густариш меёбад
«ПАРДОХТИ ЯГОНАИ КОММУНАЛӢ». Низоми нав пардохтро барои сокинон осонтар, равшантар ва шаффофтар мегардонад






