ДАР ДУШАНБЕ АНҶУМАНИ БАЙНАЛМИЛАЛИИ МАЪЮБОН БА ОХИР РАСИД

Дар он намояндагони созмонҳои маъюбони ҷумҳуриҳои Тоҷикистон, Эрон, Қазоқистон, Ӯзбекистон ва Қирғизистон ширкат варзиданд. Роҳбари ҷамъияти маъюбони шаҳри Душанбе Асадулло Зикрихудоев ба мухбири АМИТ «Ховар» гуфт, ки дар анҷуман бо иштироки намояндагони Тоҷикистон, Эрон, Қазоқистон, Ӯзбекистон ва Қирғизистон Эъломияи ҳуқуқи маъюбон қабул карда шуд. Зеро соли гузашта чунин анҷуман дар шаҳри Одессаи Украина бо иштироки ҷамъиятҳои маъюбони кишварҳои собиқи шӯравӣ баргузор гардид, ки ҳадафҳояш то имрӯз амалӣ нагаштаанд. «Аз ин рӯ, мо тасмим гирифтем, ки аввалан тадбирҳои беҳтар сохтани ҳифзи иҷтимоии маъюбонро дар 4-5 мамлакат амалӣ созем ва сипас тадриҷан онро вусъат бахшем», — идома дод роҳбари созмони маъюбони шаҳри Душанбе. Ёдовар мешавем, ки имрӯз дар ҷумҳурӣ 142 ҳазор маъюб ба қайд гирифта шудааст, ки 80 ҳазор нафари онҳо аъзои Иттиҳодияи миллии маъюбони Тоҷикистон ва 7 ҳазор нафар аъзои ҷамъияти маъюбони шаҳри Душанбе мебошанд.