ДАСТАИ МУНТАХАБИ МИЛЛИИ ОЛИМПИИ ТОҶИКИСТОН БА ДУШАНБЕ БАРМЕГАРДАД

Варзишгарон ва аъзои ҳайати расмии ҷумҳурӣ аз Пекин ба воситаи ҳавопаймои «Пекин — Урумчӣ — Душанбе» ба Тоҷикистон бармегарданд. Аз Кумитаи миллии олимпӣ ба АМИТ «Ховар» хабар доданд, ки айни ҳол масъалаи додани мукофот ба 2 нафар барандаи ҷоизаҳои олимпӣ дар сатҳи ҳукумат баррасӣ карда мешавад. Тавре хабар дода шуда буд, дар бозиҳои олимпӣ Расул Боқиев соҳиби медали биринҷӣ ва Юсуф Абдусаломов соҳиби медали нуқра гардиданд. Аз Тоҷикистон дар бозиҳои олимпӣ 15 нафар варзишгар иштирок намуд. Онҳо гулӯлапартоён Дилшод Назаров ва Галина Митяева, дзюдочиён Расул Боқиев, Шералӣ Бозоров, Неъматулло Арслонқулов, гӯштингирон Виталий Корякин, Юсуф Абдусаломов, боксчиён Анвар Юнусов, Шералӣ Достиев, Ҷаҳон Қурбонов, камонвар Албина Камолиддинова, шиноварон Катерина Измайлова, Алишер Чингизов, вазнбардор Низом Сангов ва тирандоз Сергей Бабиков мебошанд. Дастаи мунтахаби Тоҷикистон аз рӯи ҳисоби умумӣ аз ҷиҳати миқдори медал дар байни 205 дастаи мунтахаб ҷойи 66 –умро ишғол намуд. Аз рӯи маълумоти омор, ҷараёни қувваозмоиҳоро дар Бозиҳои олимпӣ бештар аз 4 миллиарду 400 ҳазор сокини сайёра тамошо кард. Маросими анҷоми бозиҳои олимпӣ 24 август баргузор гардид.