ҲАМРОХОН ЗАРИФӢ БА НЮ — ЙОРК РАФТ

Душанбе, 20 сентябр. (АМИТ «Ховар», Темур Бандишоев).- Вазири корҳои хориҷии Ҷумҳурии Тоҷикистон Ҳамрохон Зарифӣ дирӯз ба Ню-Йорк рафт. Вай дар ҳайати Тоҷикистон дар иҷлосияи 63 — юми Маҷмаи Кулли Созмони Миллали Муттаҳид иштирок менамояд. Ҳамрохон Зарифӣ дар Ню — Йорк инчунин ба ҳалли масъалаҳои омодагӣ ба сафари Президенти ҷумҳурӣ Эмомалӣ Раҳмон ба Иёлоти Муттаҳидаи Амрико машғул хоҳад шуд, ки 23 сентябр ба Ню — Йорк меравад. Зимни сафари Ҳамрохон Зарифӣ ба ИМА мулоқотҳои ӯ бо муовинони Муншии умумии СММ Ад Мелкерт, Ҷонс Холмс, Шо Зуконг, вазири корҳои хориҷии Давлати Ҳошимии Урдун Салоҳиддин Башир, сафири Исроил дар Тоҷикистон Эхуд Гул ва ғайра ба нақша гирифта шудаанд. Хабар дода мешавад, ки Президенти Ҷумҳурии Тоҷикистон Эмомалӣ Раҳмон 25 сентябр дар иҷлосияи 63 — юми Маҷмаи Кулли СММ суханронӣ хоҳад кард.