ҶАМЪБАСТИ ОЗМУНИ «СИТОРАИ СОЛ»

              Душанбе, 29 сентябр. (АМИТ «Ховар», Таҳмина  Ғоибназарова). —  4  октябр  дар  Кохи  Борбад  озмуни «Ситораи сол» ҷамъбаст  карда  мешавад. Мухбири  АМИТ «Ховар»  хабар  медиҳад, ки   озмуни  мазкур  аз  соли  1996 инҷониб  баргузор  мегардад. Ин  озмун  то  имрӯз   се  маротиба  гузаронида  шуд.         Бояд  гуфт, ки  иштирокчиёни  консерти  хотимавии  озмунро  хонандагони  ҳафтаномаи  «Оила» дар  давоми  9  моҳ  интихоб  намудаанд.         Дар оғози  эълони  озмун 80  ҳунарпеша  барои  иштирок  дар  он  ариза дода буд, вале хонандагони ҳафтанома дар ин  муддат  ба  тарафдории  20  овозхон   овоз дода,  онҳоро «Ситораи сол»  номиданд. Овозхонҳо Сироҷиддин Фозилов, Шабнами Сурайё ва Таҳмина  Ниёзова аз ҳамин  ҷумлаанд. Ҳамаи овозхонҳое, ки дар консерти хотимавӣ иштирок менамоянд, бо дипломҳо ва муҷассамаҳои  заррини  дар  шакли ситораи  панҷгӯшаи ба  пояи  булӯрин  насбшуда  мукофотонида  мешаванд.         Ба консерти  хотимавии озмун дастаи  раққосони  балети  «Виват» — и  Қазоқистон  низ даъват  шудааст.