ҶАМЪОВАРИИ ПАХТА АВҶ МЕГИРАД

Душанбе, 24 сентябр. (АМИТ «Ховар», Лаззат Диловарзод).-Аз Маркази матбуоту иттилооти Вазорати кишоварзӣ ба мухбири АМИТ «Ховар» иттилоъ доданд,ки ҷамъоварии пахта дар ҷумҳурӣ рӯз то рӯз авҷ мегирад. Тибқи маълумоти ҳамин манбаъ, то 22 сентябри соли ҷорӣ дар ҷумҳурӣ 176 ҳазору 706 тонна пахта ҷамъоварӣ карда шудааст. Акнун хоҷагиҳои пахтакори ҷумҳурӣ дар як рӯз на чун рӯзҳои пешин- 7 ҳазор тонна, балки 8 ҳазору 300- 8400 тонна пахта ҷамъоварӣ менамоянд, ки ин баробари 2, 2-5 % нақша мебошад. Кишоварзони вилояти Хатлон аз боду ҳавои мусоид истифода бурда, то имрӯз 138 ҳазору 999 тонна пахта ба хирмани Ватан ворид намуданд, ки баробари 41,9 % -и нақшаи солонаи пахтатайёркунӣ мебошад. Чиниши пахта дар 1 рӯз дар ин вилоят 5488 тоннаро ташкил медиҳад. Кишоварзони ноҳияи Ёвон дар ин муддат 14 ҳазору 392 тонна, Бохтар ба миқдори 13 ҳазору 645 тонна, Восеъ 12 ҳазору 329 тонна, Қубодиён 11 ҳазору 849 тонна, Шаҳритус ба андозаи 9830 тонна пахтаи навъи маҳиннах ҷамъоварӣ намуда, дар сафи пеши пахтакорони ҷумҳурӣ қарор дорад.