АҲОЛИИ ВМКБ БО ДОРУ ТАЪМИН КАРДА МЕШАВАД

Душанбе, 29 сентябр. (АМИТ «Ховар», Людмила Дубинина).- Раёсати тандурустии бунёди рушди  Хазинаи оғохон  қарор додааст, ки аҳолии  вилояти Мухтори Кӯҳистони Бадахшонро бо доруи хушсифат таъмин намояд. Корманди раёсати мазкур Умед Назриев ба мухбири АМИТ «Ховар» гуфт, ки  тамоми навъҳои дору  ба аҳолии вилоят бо нархи хеле арзон фурӯхта мешавад. Мо, масалан  даҳ дона доруи  парацетамолро  аз давлатҳои хориҷӣ бо нархи 1 сомонӣ харида, ба аҳолии  ВМКБ ба ивази 20 дирам мефурӯшем, гуфт вай. Ҳалли масъалаи хариди дору барои аҳолии ВМКБ  ба зиммаи  корпоратсияи рушд ва  дорушиносии Швейсария гузошта шудааст, ки  бо Хазинаи Оғохон  робитаи деринаи  ҳамкорӣ дорад. Тамоми навъҳои дору  дар  озмоишгоҳи махсуси корпоратсия ҳамаҷониба санҷида мешаванд. Дору ба аҳолии ВМКБ мувофиқи  рӯйхатти тасдиқнамудаи Вазорати тандурустии Тоҷикистон харида ва фиристода мешаванд.