ДУЗД ДАР РӮЗИ ИД ДАСТГИР ШУД

Душанбе, 10 сентябр. (АМИТ «Ховар», Мавҷуда Давлатзода).- Коргари корхонаи «Рембиттехника» Фарҳод Усмонови 22-сола, истиқоматкунандаи кӯчаи Рӯдакии ноҳияи Сино ба Шӯъбаи корҳои дохилии рақами дуюми ноҳияи Сино ариза дода, шикоят карда буд, ки моҳи майи соли 2007 шахсони номаълум пинҳонӣ вориди корхонаи мазкур шуда, аз он ҷо асбобҳои заргариро ба маблағи 1700 сомонӣ дуздиданд. Мувофиқи аризаи коргари дигари ҳамин корхона Дилмурод Азизмуродови 22-сола аз корхона ба маблағи 14 ҳазору 870 сомонӣ маснуоти тилло ва асбобҳои заргарӣ дуздида шудаанд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки 9 сентябри соли ҷорӣ шаҳрванд Дилшод Элбекови 23-сола дастгир карда, аз ӯ далелҳои шайъӣ гирифта шуданд. Тафтиши ин воқеа давом дорад.