ИШТИРОКИ ПРЕЗИДЕНТИ ТОҶИКИСТОН ДАР ИҶЛОСИЯИ СААД

Субҳи рӯзи 5 сентябр Президенти Ҷумҳурии Тоҷикистон Эмомалӣ Раҳмон барои иштирок дар иҷлосияи навбатии Шӯрои амнияти дастаҷамъии Созмони Аҳдномаи амнияти дастаҷамъӣ ба шаҳри Маскав рафт. Дар шаҳри Маскав сарони ҳамаи давлатҳои аъзои созмон ҷамъ омаданд. Хотиррасон мекунем, ки ба Созмони Аҳдномаи амнияти дастаҷамъӣ Арманистон, Белорусия, Русия, Тоҷикистон, Ӯзбекистон ва Қазоқистону Қирғизистон шомиланд. Дар иҷлосияи навбатии Шӯрои амнияти дастаҷамъӣ роҷеъ ба маҷмӯи васеи масъалаҳои марбут ба амнияти минтақавию ҷаҳонӣ ва густариши ҳамкориҳои ҳарбӣ ва ҳарбӣю техникӣ табодули назар карда шуд. Президенти Ҷумҳурии Тоҷикистон Эмомалӣ Раҳмон зимни муҳокимарониҳо, аз ҷумла таъкид кард, ки афзун гардондани самараи фаъолияти Созмони Аҳдномаи амнияти дастаҷамъӣ аз ҷумлаи вазифаҳои муҳими имрӯза мебошанд. Эмомалӣ Раҳмон таҳкиму густариш додани ҳамкории ҳарбӣ ва ҳарбӣю техникӣ, ҳамгироиӣ дар мубориза ба муқобили терроризм ва хусусан истеҳсол ва гардиши ғайриқонунии маводи мухаддирро аз ҷумлаи тадбирҳои муҳим ва саривақтӣ маънидод кард. Сарони давлатҳо зимни нишастҳои расмӣ аз рӯйи натиҷаҳои он Эъломияи хотимавӣ ва санадҳои дигарро оид ба ҳамкории ҳарбӣю сиёсӣ ва ҳарбӣю техникӣ, амнияти иттилоотӣ, омодасозии кадрҳои барои сохторҳои қудратӣ ва мубориза ба муқобили зуҳуроти номатлуби замони ҳозира, аз ҷумла гардиши ғайриқонунии маводи мухаддир қабул намуданд. Шоми ҳамон рӯз Президенти Ҷумҳурии Тоҷикистон Эмомалӣ Раҳмон баъди анҷоми сафар аз шаҳри Маскав ба Ватан баргашт. Дар ин бора ба АМИТ «Ховар» аз хадамоти матбуоти Сарвари давлат иттилоъ доданд.