КОНФРОНСИ САФИРИ КАБИРИ ТОҶИКИСТОН ДАР ЧИН

Душанбе, 17 сентябр. (АМИТ «Ховар», Наргис Бояхмедова). – Сафири фавқулодда ва мухтори Тоҷикистон дар Чин Рашид Олимов, раиси Кумитаи миллии параолимпии ҷумҳурӣ Сафар Боев ва иштирокчиёни Бозиҳои олимпии варзишгарони маъюб дар Пекин аз Тоҷикистон дар конфронс иштирок намуданд, ки таҳти унвони «Рафъи мушкилот, тавозуни зиндагӣ ва ширкат дар мусобиқаҳои мӯътабар» дар Пекин баргузор гардид ва 16 сентябр мустақиман ба воситаи Радиои байналмилалии Чин шунавонида шуд. Р.Олимов, С.Боев ва варзишгарони тоҷик баъди анҷоми конфронс бо муовини директори Радиои байналмилалии Чин Ван Минхуа мулоқот карданд. Дипломати тоҷик барои даъвати иштирок дар конфронс ба роҳбарияти радиои байналмилалии Чин изҳори сипос намуд. Вай зикр кард, ки солҳои охир муносибатҳои дуҷонибаи Тоҷикистону Чин муттасил густариш меёбанд. Ин на танҳо равобити тиҷоратию иқтисодии ҳар ду мамлакатро инъикос менамояд, балки ба туфайли равнақу ривоҷи муносибатҳои дуҷониба варзишгарони тоҷик дар Бозиҳои тобистонаи олимпӣ бомуваффақият иштирок намуданд.