МАШҚИ ҲАРБИИ ЗИДДИТЕРРОРИСТӢ

Душанбе, 11 сентябр. (АМИТ «Ховар», Наргис Бойаҳмедова).- Имрӯз дар пойтахти Ҷумҳурии Белорусия — шаҳри Минск даври дуюми машқи ҳарбии ҳайатҳои қумондонии ситодҳои зудамали мамлакатҳои ИДМ таҳти унвони «Бастион — Антитеррор- 2008» баргузор мегардад. Машқи мазкур мувофиқи барномаи ҳамкории давлатҳои ИДМ дар мубориза ба муқобили терроризм ва зуҳуроти дигари зӯроварию ифротгароӣ дар давраи солҳои 2008 -2010 ва низомномаи фаъолияти Маркази зиддитеррористии мамлакатҳои ИДМ гузаронида мешавад. Дар ҷараёни машқ тартиби ташкил ва амалӣ сохтани тадбирҳои гуногуни муштараки таъҷилӣ бо мақсади ошкор сохтан ва собит намудани фаъолияти зиддиқонунии аъзои созмонҳои террористии байналхалқӣ, тафтиши самаранокии муҳофизати муассисаҳои мудофиаи шаҳрвандӣ аз террористон, намоиши роҳу усулҳои нави тактикии дар ҷараёни пешгирии фаъолияти террористӣ истифодашаванда ва ғайра санҷида ва мувофиқа карда мешаванд. Мухбири АМИТ «Ховар» хабар медиҳад, ки дирӯз, 10 сентябр дар Минск мулоқоти роҳбарони мақомоти зиддитеррористии мамлакатҳои ИДМ баргузор гардид. Машқи мазкур таҳти сарпарастии Маркази зиддитеррористии ИДМ ва Кумитаи амнияти давлатии Белорусия гузаронида мешавад. Дар он ҳайатҳои мақомоти амният ва хадамоти махсуси мамлакатҳои Иттиҳод, намояндагони муассисаҳои кории ИДМ, СААД, кумитаи иҷроияи Маркази минтақавии зиддитеррористии СҲШ ва намояндагони низомии хориҷии дар Белорусия қарордошта ширкат меварзанд.