МУЛОҚОТИ ВАЗИР БО ДУХТУРОНИ БЕМОРИҲОИ ЗАНОНА

 Душанбе, 23 сентябр. (АМИТ «Ховар», Ибодат Давлатова).- 20 сентябри соли равон вазири тандурустии Ҷумҳурии Тоҷикистон Нусратулло Салимов бо гурӯҳи духтурони бемориҳои занонаи шаҳру ноҳияҳои тобеи ҷумҳурӣ мулоқот кард. Тавре аз дафтари матбуоти вазорати тандурустии Ҷумҳурии Тоҷикистон иттилоъ доданд, дар мулоқот роҷеъ ба вазъи хизматрасонӣ ба модару кӯдак дар Ҷумҳурии Тоҷикистон ва инъикоси фаъолияти духтурони бемориҳои занона дар васоити ахбори омма табодули назар карда, зикр намуданд, ки дар муассисаҳои ҳифзи саломатии модар ва кӯдак камбудиҳо низ ҷой доранд. Аз ин рӯ, бояд сиёсати кадрӣ оид ба дастгирии мутахассисони лаёқатманду баландихтисос дар сатҳи зарурӣ ба роҳ монда шавад. Қариб дар тамоми таваллудхонаҳои ҷумҳурӣ мутахассисони ҷавон ба амалиёти ҷарроҳӣ ҷалб намешаванд, ки ин боиси бетаҷриба мондани онҳо мегардад. Чуноне ки мудири бахши модаршавии бехавф ва танзими оилаи вазорати тандурустӣ Гулбаҳор Ашӯрова зикр намуд, дар баъзе ноҳияҳои дурдасти ҷумҳурӣ шумораи табибони акушер-гинеколог кам ё тамоман нест. Аз ҷумла, дар ноҳияҳои Балҷувон, Тавилдара ва Н. Хисрав ин ҳолат ба мушоҳида мерасад. Нишондиҳандаи фавти модарон дар ин ноҳияҳо дар ҳашт моҳи соли 2007 ба 36,7 фоиз ва дар ҳашт моҳи соли 2008 ба 41,3 фоиз баробар шуд. Аз ҳама бештар ташвишовар он аст, ки имрӯз дар баъзе таваллудхонаҳои ии ҷумҳурӣ порахӯрӣ ва пулситонии ғайриқонунӣ давом дорад. Дар баробари ин муносибати некхоҳонаи табибон нисбати беморон ва мизоҷон қариб, ки аз байн рафтааст. Дар фарҷоми мулоқот вазири тандурустии кишвар Н.Салимов мутахассисони соҳаро даъват намуд, ки барои бартараф намудани камбудиҳои ҷойдошта саъю кӯшиш намоянд, донишу малакаи хешро истифода намоянд, то андешаи мардум нисбати фаъолияти духтурони бемориҳои занона хубтар гардад. Таъкид карда шуд, ки духтурон муомилаи хубро нисбати корафтодагон набояд фаромуш кунанд.