МУСОФИРКАШОНӢ БЕҲТАР ШУД

Душанбе, 23 сентябр. (АМИТ «Ховар», Лаззат Диловарзод).- Аз Корхонаи воҳиди давлатии «Роҳи оҳани Тоҷикистон» ба мухбири АМИТ «Ховар» иттилоъ доданд, ки дар давоми ҳашт моҳи соли ҷорӣ мусофиркашонӣ нисбат ба ҳамин давраи соли гузашта беҳтар шуд. Дар давоми моҳҳои январ – августи соли 2008 тавассути нақлиёти роҳи оҳан 511,6 ҳазор нафар мусофир кашонда шудааст, ки ин нисбат ба ҳамин давраи соли 2007 3,1 фоиз зиёд аст. Дар қитъаи душанбегии роҳи оҳани Тоҷикистон дар давоми ҳашт моҳи соли ҷорӣ 309,3 ҳазор нафар мусофир кашонида шудааст. Дар ин муддат дар қитъаи роҳи оҳани вилояти Суғд 137,4 ҳазор нафар ва дар қитъаи роҳи оҳани Хатлон 64,9 ҳазор нафар мусофир кашонида шудааст. Корхонаи воҳиди давлатии «Роҳи оҳани Тоҷикистон» барои боз ҳам пурсамар гардонидани кори мусофиркашонӣ тадбирҳои беҳтарро пайгирӣ мекунад.