НАҚША ИҶРО МЕШАВАД

Душанбе, 18 сентябр. (АМИТ «Ховар», Лаззат Диловарзод).- Бино ба иттилои сардори Раёсати растанипарварии Вазорати кишоварзӣ Саидмурод Баҳриддинов, ноҳияи Ёвон соли ҷорӣ аз иҷрои нақшаи ҷамъоварии пахта ба хубӣ баромада метавонад. Барои ин ҳамаи асосҳо вуҷуд доранд. Тибқи нақша, хоҷагиҳои пахтакори ин ноҳия соли ҷорӣ 32 ҳазору 100 тонна пахта ба хирмани умумии «Ҳосил- 2008» супориданианд. Дар ин рӯзҳо дар пахтазор бештар аз 13 ҳазор нафар чинакчиёну ёрдамчиён ба ҷамъовари пахта мебароянд ва ба ҳисоби миёна ҳар яки он 43,7 килограмм пахта меғундоранд. Дар як рӯз дар ноҳия бештар аз 890 тонна пахта ҷамъоварӣ мегардад. Аз аввали мавсим то имрӯз дар ноҳия 9 ҳазору 100 тонна пахта ҷамъоварӣ шудааст, ки ин ба 27,8 фоизи нақша баробар мебошад.