НАМОИШИ ЛИБОСҲОИ НАВБАРОМАД

Душанбе, 20 сентябр. (АМИТ «Ховар», Тахмина Ғоибназарова).- 19 сентябр дар маркази «ВЕФА» — и пойтахт дар доираи ҷашнвораи байналхалқии ҷавонон, таҳти унвони «Ороиш — 2008» намоиши либосҳои навбаромад баргузор гардид. Дар он 7 нафар либосдӯзони касбӣ ва 12 нафар донишҷӯ иштирок дошт. Дар байни онҳо моделсози тоҷик Мавлуда Ҳамроева беҳтарин дониста шуд. Аъзои ҳайати байналмиллалии доварон аз Русия, Қазоқистон ва Тоҷикистон Мавлуда Ҳамроеваро моделсози беҳтарини сол эътироф намуданд. Дипломи махсуси Иттифоқи дизайнерҳои Тоҷикистон, Федератсияи Русия ва Қазоқистон насиби У.Кучкалиев гардид. Моделсози тоҷик Ҷ Ҳотамов дар бахши офаридани либосҳои қадимаи миллӣ ҷои аввалро ишғол кард. Моделсозон Беҳрӯз Имонов ва Тахмина Назарова дар бахши офаридани либосҳои навбаромади аврупоӣ ба ҷои аввл соҳиб гардиданд Мухбири АМИТ «Ховар» хабар медиҳад, ки дар либосҳои пешниҳоднамуди иштирокчиёни озмун манзараҳои гуногун аз достони «Шоҳнома», ҷанги форсҳо ва юнониён, мазмунҳои арабию ориёнӣ тасвир ёфта буданд. Либосҳо, сарпӯшҳо ва сарбандҳои пешниҳоднамудаи онҳо бо риштаҳои заррин, сангҳои қимматбаҳо ва нақшу нигори миллӣ оро ёфта буданд. Пешгӯӣ кардан мумкин аст, ки либосҳои дар озмун намоишдодашударо ояндаи наздик ҳаводорони либосҳои навбаромад дар зиндагии ҳаррӯзаи худ истифода хоҳанд бурд.