ПРЕЗИДЕНТИ ТОҶИКИСТОН ПРЕЗИДЕНТИ ПОКИСТОНРО ТАБРИК НАМУД

Президенти Ҷумҳурии Тоҷикистон Эмомалӣ Раҳмон имрӯз ба унвони Президенти нави Ҷумҳурии Исломии Покистон Осаф Алии Зардорӣ барқияи шодбош фиристод. Дар он, аз ҷумла, гуфта мешавад: «Ҷаноби аълоҳазрат, табрикоти самимонаи маро ба муносибати интихоб гардиданатон ба мансаби олии Президенти Ҷумҳурии Исломии Покистон қабул фармоед. Тоҷикистон ба сатҳи имрӯзаи муносибатҳои мутақобилан муфиди худ бо Покистон баҳои баланд медиҳад, ки ҷавобгӯӣ манфиатҳои миллии ҳар ду давлат мебошанд. Умед аст, ки муносибатҳои мутақобилан муфид ва доманадори Тоҷикистону Покистон дар заминаи принсипҳои баробарҳуқуқӣ, эҳтироми ҳамдигар ва манфиатҳои дуҷониба боз ҳам бештар ривоҷ хоҳанд ёфт. Аз фурсати мусоид истифода бурда, изҳор менамоям, ки мо тайёрем, ҳамроҳи Шумо барои вусъати минбаъдаи ҳамкории Ҷумҳурии Тоҷикистон ва Ҷумҳурии Исломии Покистон кӯшиш ба харҷ диҳем. Ба Шумо, ҷаноби аълоҳазрат, саломатӣ, хушбахтӣ, барори кор ва ба халқи бо мо дӯсти Покистон сулҳу осоиш ва рӯзгори фараҳмандона орзу менамоям».