ТЕХНИКАИ АГРАРӢ АЗ ПАРДОХТИ АНДОЗ ОЗОД МЕШАВАД

Душанбе, 12 сентябр. (АМИТ «Ховар», Бекназари Абӯбакр). — Пешравӣ ва рушди соҳаи кишоварзиро бе техника тасавур кардан мумкин нест. Дар корхонаҳои кишоварзӣ ва хоҷагиҳои деҳқонӣ (фермерӣ) то соли 1999 қариб 40 намуди техникаи аграрӣ мавриди истифодабарии кишоварзон қарор дошт. То 1 сентябри соли ҷорӣ бошад ҳамагӣ 23 намуди техника машғули кор аст, ки дар муқоиса нисбат ба солҳои пешин хеле кам аст. Бо ибораи дигар имрӯз талаботи кишоварзони ҷумҳурӣ ҳамагӣ 53,5 фоиз таъмин мегардад. Аз маркази матбуот ва иттилооти Вазорати кишоварзӣ ба мухбири АМИТ «Ховар» иттилоъ доданд, ки сармоягузорон ва ширкатҳои хусусӣ бо вуҷуди мушкилиҳо соли гузашта ба мамлакат 238 трактор ва 500 мошинҳои дигари кишоварзӣ ворид намуданд, ки нисбат ба соли 2006-ум 211 адад зиёд мебошад. Инчунин, бо дастгирии Ҳукумати Ҷумҳурии Тоҷикистон Корхонаи воҳиди давлатии «Тоҷикагролизинг» таъсис дода шуд ва ҳамасола 8 миллион сомонӣ маблағ ҷудо мегардад, ки бо ин маблағ техникаҳои кишоварзӣ дар асоси шартномаҳои лизингӣ ба хоҷагиҳо дода мешавад. Айни замон корхонаҳои кишоварзӣ, хоҷагиҳои деҳқонии ҷумҳурӣ бо роҳи имзои шартномаҳои лизингӣ техникаи гуногуни кишоварзиро харидорӣ мекунанд. Тоҷирони дохилию хориҷӣ бо вуҷуди боҷи гарони гумрук ба ҷумҳурӣ техникаҳои гуногуни соҳаи кишоварзӣ ворид мекунанд. Вале, мутаасифона на ҳамаи хоҷагиҳои деҳқонӣ қудрати харидории техникаи аграриро бо нархи гарон доранд. Бо мақсади ҳавасмандии воридкунандагони техникаи кишоварзӣ ҷиҳати рушди минбаъдаи соҳа, воридсозии техника ва технологияи нав , дар ҷумҳурӣ ба роҳ мондани истеҳсоли қисмҳои эҳтиётӣ ва қисмҳои алоҳида , инчунин бо мақсади беҳтар намудани таъминоти соҳаи кишоварзӣ бо трактору мошинҳо ва қисмҳои эҳтиёти онҳо, ки дар корхонаҳои ҷумҳурӣ истеҳсол карда мешаванд, бояд ба муддати 5 сол воридоти онҳо аз пардохти андоз ва арзиши иловашуда озод карда шаванд. Аз тарафи Вазорати кишоварзӣ оиди ин масъала лоиҳаи қарор таҳия карда, ба Ҳукумати Ҷумҳурии Тоҷикистон пешниҳод шудааст.