ЮНЕСКО БА ШАҲРВАНДИ ҶТ УНВОНИ «ҲУНАРПЕШАИ СУЛҲ» — РО ДОД

Душанбе, 18 сентябр. (АМИТ «Ховар», Темур Бандишоев). — 17 сентябр дар қароргоҳи марказии ЮНЕСКО дар Париж маросими эҳдои унвони ифтихории «Ҳунарпешаи ҷаҳон» ба шаҳрванди Ҷумҳурии Тоҷикистон Амриддин Аминов баргузор гардид. Мухбири АМИТ «Ховар» хабар медиҳад, ки унвони фахрии «Ҳунарпешаи ҷаҳон» ба ходимони ҷамъиятии мамлакатҳои ҷаҳон барои саҳми бузургашон дар амалӣ сохтани ғояҳои сулҳ ва сабру таҳаммул дода мешавад. Тоҷикистон дар байни мамлакатҳои Осиёи Марказӣ ягона мамлакатест, ки намояндаи он ба чунин унвони олии байналхалқӣ сазовор гардидааст. Дар маросими супурдани диплом ба А.Аминов директори генералии ЮНЕСКО, сафири фавқулодда ва мухтори Тоҷикистон дар шоҳигарии Белгия Саймӯмин Ятимов, ходимони намоёни ҷамъиятӣ ва воситаҳои ахбори оммавии Фаронса ҳузур доштанд.