«ЗАНИ САРВАТМАНД» ҲУНАРМАНДОНИ ТОҶИКРО СОҲИБИ ҶОИЗА ГАРДОНД

Душанбе, 10 сентябр. (АМИТ «Ховар», Таҳмина Ғоибназарова). – Аз 2 то 6 сентябр дар шаҳри Алмаато ҷашнвораи байналхалқии театрҳои Осиёи Марказӣ баргузор гардид. Дар он Театри давлатии ҷавонони Тоҷикистон ба номи М.Воҳидов ва Театри мусиқии мазҳакавии шаҳри Қӯрғонтеппа ба номи А.Муҳаммадҷонов ширкат варзиданд. Ҳунармандони Театри ҷавонони Тоҷикистон асари саҳнавии коргардон Султон Усмонов «Зани сарватманд» ва ҳунармандони театри Қӯрғонтеппа асари саҳнавии коргардон Б.Раҷабов «Ёри ягонаи ту» -ро пешкаши тамошобинон гардонданд. Ин асарҳои саҳнавӣ тамошобинон ва ҳайати доваронро ба ваҷд оварданд. Ҳунарпешаи халқии Тоҷикистон Н.Нуриддинов барои офаридани нақши асосии мардона дар асари саҳнавии «Ёри ягонаи ту» ҷоизаи асосиро ба даст оварда, соҳиби 2900 доллари ИМА гардид. Ба намоишномаи мазкур ба маблағи 1700 доллари ИМА мукофоти вазири фарҳанг ва иттилооти Қазоқистон дода шуд. Барои гирд овардани гурӯҳи ҳунарпешагони боистеъдод ба намоишномаи «Зани сарватманд» ба маблағи 3200 доллари ИМА мукофот дода шуд.