ДАР ТОҶИКИСТОН ДУ МИНТАҚАИ ОЗОДИ ИҚТИСОДИ ТАШКИЛ КАРДА МЕШАВАД

            Душанбе, 29 октябр. (АМИТ «Ховар», Марзия Саидова).- Вақтҳои наздик дар шимолу ҷануби Тоҷикистон ду Минтақаи озоди иқтисодӣ -Минтақаи озоди иқтисодии «Суғд» ва «Панҷ» ташкил карда мешавад. Дар робита 29 октябр вакилони палатаи поёнии парлумони мамлакат лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон дар хусуси Низомномаи минтақаҳои озоди иқтисодии «Суғд» ва «Панҷ»-ро тасдиқ карданд.             Ба гуфти муовини аввали вазири рушди иқтисод ва савдои ҷумҳурӣ Амонулло Ашӯр лоиҳаи ин санад аз ҷониби Ҳукумати Ҷумҳурии Тоҷикистон бо мақсади ҷалби ҳар чи бештари сармояи хориҷӣ, ташкили ҷойҳои кор ва аз ҳама беш рушди иқтисодиёти миллӣ таҳия гардидааст.            Минтақаи озоди иқтисодии «Суғд» дар қисмати ҷанубу ғарбии шаҳри Хуҷанд дар масоҳати 320 гектар ба мӯҳлати 25 сол ташкил карда мешавад.            Минтақаи озоди иқтисодии «Панҷ» бошад дар масоҳати 400 гектар дар ҳудуди ноҳияи Қумсангир ба муддати 25 сол ташкил мегардад. Ин Минтақаи озоди иқтисодӣ истеҳсолию тиҷоратӣ буда, дар он асосан маҳсулоти кишоварзӣ коркард ва истеҳсол карда мешавад .            Муовини аввали вазири рушди иқтисод ва савдои ҷумҳурӣ Амонулло Ашӯр зимни мусоҳиба ба хабарнигори АМИТ «Ховар» гуфт, ки тамоми корхонаю муассисаҳое, ки дар ҳудуди Минтақаи озоди иқтисодӣ фаъолият менамоянд тибқи Қонуни Ҷумҳурии Тоҷикистон «Дар бораи минтақаҳои озоди иқтисодӣ дар Ҷумҳурии Тоҷикистон», ки моҳи майи соли 2004 қабул шудааст, аз пардохти қариб ҳамагуна андозҳо ғайр аз андози иҷтимоӣ озоданд.            Инчунин, дар ҳудуди Минтақаҳои озоди иқтисодӣ ба шаҳрвандони хориҷӣ, ки хоҳиши дар Минтақаи озоди иқтисодӣ кор карданро доранд, барои гирифтани раводиди Тоҷикистон имтиёзҳо пешбинӣ мешавад.           Назар ба гуфти А. Ашӯр рӯзҳои наздик Ҳукумати Ҷумҳурии Тоҷикистон Қарор қабул менамояд, ки дар асоси он роҳбарони Минтақаҳои озоди иқтисодии «Суғд» ва «Панҷ» таъин карда шуда, баъдан ин Минтақаҳо ба фаъолият шурӯъ менамоянд.            Ба фаъолият шурӯъ кардани ду Минтақаи озоди иқтисодӣ дар шимолу ҷанубу Тоҷикистон бешак ба рушди иқтисодиёти кишварамон такони ҷиддие бахшида, ба тақвияти ҳамкории иқтисодию тиҷоратии Тоҷикистон бо кишварҳои минтақа- Афғонистон, Покистон, Эрон, Ҳиндустон, Ӯзбекистон, Қирғизистон, Қазоқистон ва ғайраҳо мусоидат менамояд.