КАМ КАРДАНИ ҲАҶМИ МАБЛАҒИ БАҚИЯПУЛИҲО

                   Душанбе, 30 октябр. (АМИТ «Ховар», Покиза Маҳмадбекова). — Аз рӯи иттилои Вазорати молия, ҳаҷми маблағи бақияпулиҳои андозӣ афзоиш ёфта, ба 1 сентябри соли 2008 ба 445,7 миллион сомониро ташкил мекунад, ки ин нисбат ба аввали сол 59,2 миллион сомонӣ ва нисбат ба ҳамин давраи соли гузашта 191,4 миллион сомонӣ зиёд мебошад.                  Аз ин лиҳоз Вазорати молия дар якҷоягӣ бо Кумитаи андоз ва Хадамоти гумрук оиди ба танзим даровардани бақияпулиҳо ва минбаъд роҳ надодан ба зиёдшавии онҳо корҳои заруриро андешида истодаанд, то ки ҳаҷми онҳоро то охири сол аз рӯи воқеӣ будани онҳо кам намоянд.                  Ғайр аз ин, дар баъзе соҳаҳои буҷетӣ маблағгузорӣ нисбатан паст мебошад ва сабаби асосии он ин сари вақт нагузаштани комиссияҳои тендерӣ, иҷро нагардидани ҳаҷми корҳо дар иншоотҳои сохтмонӣ ва аз тарафи роҳбарони ташкилоту идорахо дар мӯҳлати муайяншуда пешниҳод накардани сметаҳои хароҷотӣ ва дигар ҳуҷатҳои маблағгузорӣ мебошад.                  Аз ин лиҳоз Вазорати молия оиди ҷорӣ намудани стандартҳои байналмилалии ҳисоботи молиявӣ то охири соли ҷорӣ 34 тавсияномаҳои методӣ таҳия ва барои истифодабарӣ дар соҳаҳои иқтисодиёт пешниҳод намудааст.                 Дар айни замон аз рўи ин стандартҳо бо низоми нави баҳисобгирии бухгалтерӣ 79 корхонаю ташкилотҳои ҷумҳурӣ фаъолияти молиявӣ мебаранд.