РАЗАВИ МУДИРИ НАВИ ИМДОД ДАР ТОҶИКИСТОН

               Душанбе, 31 октябр.(АМИТ «Ховар», Марзия Саидова).- Сайид Ҷаводи Разавӣ мудири нави намояндагии Кумитаи байналмилалии имдоди имом Хумайнии Ҷумҳурии Исломии Эрон дар Ҷумҳурии Тоҷикистон ба мӯҳлати ду сол таъин гардид. Ба ин муносибат дар Душанбе маросими муаррифии мудири нави Кумитаи мазкур баргузор шуд, ки дар он дар қатори намояндагони вазорату идораҳои марбутаи Тоҷикистон намояндаи мақоми муаззами раҳбарии Эрон дар Кумитаи имдоди имом Хумайнӣ, раиси Шӯрои марказии ин созмон Ҳабибуллоҳ Аскаравлодӣ, Сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғар Амир Шеърдӯст иштирок намуда, роҷеъ ба фаъолияти намояндагии ин Кумита ва ҳамкориҳои мутақобилан судманди Тоҷикистону Эрон ибрози назар карданд.              Намояндагии Кумитаи мазкур 14 сол аст, ки дар Тоҷикистон фаъолият дошта, ба зиёда аз 14 ҳазор нафар оилаҳои камбизоати ҷумҳурӣ дар бахшҳои гуногун кӯмак мерасонад. Инчунин, дар шаҳрҳои Душанбе, Кӯлоб, Қӯрғонтеппа, Хуҷанд, Хоруғ, Ваҳдат, ноҳияҳои Нуробод, Рашт намояндагӣ ва марказҳои омӯзишии дӯзандагиро ифтитоҳ кардааст, ки дар як сол ин марказҳои омӯзиширо беш аз 1400 нафар занону духтарони маҳаллии тоҷик хатм намуда, соҳиби шуғли муайян мегарданд.               Қаблан роҳбарии намояндагии Кумитаи мазкурро дар Тоҷикистон Сайид Ҳомид Азимӣ ба ӯҳда дошт.