С. МИРОНОВ АЗ РУШДИ РОБИТАҲОИ БАЙНИПАРЛУМОНИ ҚАНОАТМАНД ШУД

              Душанбе, 28 октябр. (АМИТ «Ховар», Марзия Саидова).- «Федератсияи Россия шарики боэътимоди Ҷумҳурии Тоҷикистон ба шумор рафта, муносибатҳои сиёсию иқтисодӣ ва иҷтимоию фарҳангии ҳар ду кишвар сол аз сол густариш меёбанд», гуфт зимни мулоқоташ Раиси Маҷлиси намояндагони Маҷлиси Олии ҷумҳурӣ Сайдулло Хайруллоев бо Раиси Шӯрои Федератсияи Маҷлиси Федералии Федератсияи Россия Сергей Миронов.              С. Хайруллоев рушди ҳамкориҳоро самараи неки сиёсати пешгирифтаи сарони ҳар ду кишвар- Эмомалӣ Раҳмон ва Дмитрий Медведев арзёбӣ кард. Ӯ таъкид намуд, ки нахустин сафари Д. Медведев ба Тоҷикистон ва мулоқоти ӯ бо роҳбарони баландпояи Тоҷикистон қадами устуворе гардид дар таҳкими робитаҳои ҳасана.             С. Миронов аз сатҳи ҳамкориҳои байнипарлумонии Тоҷикистону Россия изҳори қаноатмандӣ кард. Вай баргузории сеюмин Форуми байнипарлумониро дар Душанбе, ки он ба ҳалли масъалаҳои муҳими ҳар ду кишвар заминаи боэътимод фароҳам хоҳад овард, муҳим арзёбӣ намуд.             Дар мулоқот дурнамои ҳамкориҳои байнипарлумонӣ дар бахшҳои гуногун ва густариши муносибатҳо дар доираи Иттиҳоди Давлатҳои Мустақил баррасӣ шуданд.