ТАВСИЯИ ОЛИМОН

               Душанбе, 29 октябр. (АМИТ «Ховар», Лаззат Диловарзод).- Академияи илмҳои кишоварзии Тоҷикистон ва Пажӯҳишгоҳи зироаткорӣ доир ба рӯёнидани ду ҳосил ва истифодабарии заминҳои обӣ китобчаеро таҳти унвони «Тавсияҳо доир ба рӯёнидани ду ҳосили зироатҳо ва истифодабарии самараноки заминҳои обӣ» аз чоп бароварданд.   Дар китобча муаллифон — аъзои Академияи илмҳои кишоварзӣ профессор, Аҳмадов Ҳ.М., узви вобастаи Академияи илмҳои кишоварзии Тоҷикистон профессор Бухориев Т.А., доктори илмҳои кишоварзӣ Саидов СТ. ва дигарон дар бораи дар шароити Тоҷикистон имконияти дар як сол гирифтани ду ҳосили дон ва имкониятҳои воқеии зиёд намудани маҳслоти кишоварзӣ аз ҳисоби истифодаи самараноки заминҳои обӣ тавсияҳои муфид додаанд.              Дар сурати дастрас шудани ин тавсияҳо ба мутахассисони хоҷагиҳои деҳқонӣ, фермерҳо ва иҷоракорон донишу малакаи худро дар бораи рӯёнидани ҳосили баланди зироатҳои ғалладонагӣ аз кишти такрорӣ, мӯҳлати кишти асосӣ ( тирамоҳӣ), истифодаи навъҳои пешпазаки зироатҳо пурра карда метавонад.              Китобча чун дастури методӣ на фақат барои кишоварзон, балки ҳамчун дастури ёрии методӣ барои донишҷӯёни донишгоҳи кишоварзии Тоҷикистон ҳам аз аҳамият холӣ нест.