ҲОЛАТИ БАДИ МЕЛИОРАТИВИИ ЗАМИНҲО ВА НОРАСОИИ КАДРҲО

       Душанбе, 25 ноябр. (АМИТ «Ховар», Лаззат Диловарзод). — Дар маҷлиси ҳайати мушовараи Вазорати кишоварзӣ иброз доштанд ки дар самтҳои алоҳидаи соҳаи кишоварзӣ муаммоҳо зиёданд.Ин муаммоҳо садди роҳи пешрафти соҳа ва ҳалли масоили чорабиниҳои агротехникию зооветеринарӣ мегарданд.       Механизми нави маблағгузорӣ дар соҳаи пахтакорӣ ҷорӣ карда шуда аст, вале масъалаи қарзи хоҷагиҳо то ҳол ҳалли худро наёфтааст. Норасоии доруҳои минералӣ ва заҳрхимикатҳо ба пешрафти соҳа халал мерасонанд.       Дар давраи гузариш ба иқтисоди бозорӣ мутобиқ намудани маълумоти омории кишоварзӣ, ҳолати бади мелиоративии заминҳо, норасоии тухмиҳои хушсифат ва кадрҳои таҷрибадори соҳа аз омилҳое мебошанд, ки таъсири манфии худро ба рушди соҳа мерасонанд.