ҶАМЪИЯТИ БАРҲАМХӮРДАЕ, КИ ЧИЗЕ НАДОШТ, ЭҲЁ МЕШАВАД

          Хоруғ. 22 ноябр. (АМИТ «Ховар», Л. Додоев). — Тавре раиси Ҷамъияти матлуботи ВМКБ Зафар Наврӯзмамадов иттилоъ дод, то имрӯз ба хотири эҳёи Ҷамъияти матлуботи шаҳри Хоруғ, умуман Ҷамъияти матлуботи вилоят, корҳои зиёде сомон дода шудааст.          Дар шаҳри Хоруғ маркази савдо, мағозаҳои гӯшту молҳои омехта, чойхона, ошхона, қаҳвахона, маркази фурӯши ангиштсанг ба фаъолият оғоз намуданд. «Мо ин амалро дар кулли навоҳии вилоят идома медиҳем»,- гуфт Зафар Наврӯзмамадов.            Лозим ба ёдоварист, ки баробари пеш омадани иқтисоди бозорӣ, дар як муддати кӯтоҳ теъдоди зиёди биноҳои мағоза, ошхонаю қаҳвахонаҳои Ҷамъияти матлуботи ВМКБ фурӯхта шуда буд. Ҷамъияти матлуботи шаҳи Хоруғро тамоман барҳам дода буданд, зеро дар ихтиёраш қариб ки чизе надошт.