ҶАВОНОНИ ДУШАНБЕ АЛАЙҲИ СПИД МУБОРИЗА МЕБАРАНД

              Душанбе, 29 ноябр. (АМИТ «Ховар», Марзия Саидова).- 1-уми декабр ҷомеаи ҷаҳонӣ Рӯзи байналмилалии мубориза бар зидди СПИД-ро қайд менамоянд.             Дар остонаи ин сана дар шаҳри Душанбе таҳти унвони «Ҷавонони Душанбе бар зидди СПИД мубориза мебаранд» амалиёти якмоҳа гузаронида шуд, ки он 1-уми декабр ҷамъбаст мегардад.            Тибқи иттилои сардори Раёсати кор бо ҷавонон, варзиш ва сайёҳии шаҳри Душанбе Дилшод Қурбонов, дар доираи амалиёти якмоҳа дар донишгоҳу донишкадаҳо, муассисаҳои таълимию тарбиявӣ, марказҳои кӯдакон чорабиниҳои гуногуни тарғиботию ташвиқотӣ гузаронида шуд.             Зимни сӯҳбату вохӯриҳо бо ҷавонону наврасон масоили нашъамандӣ ва оқибатҳои он, солиму тандурст нигоҳ доштани ҷомеа ва муборизаи ҷомеа бо вабои аср- СПИД матраҳ гардиданд. Инчунин, викторинаҳо, намоишҳои театрикунонидашуда ташкил ёфта, миёни ҷавонон ва наврасон китобчаҳо ва ҳар гуна навиштаҷот доир ба нашъамандӣ ва пешгирии оқибатҳои он паҳн карда шуд.            Амалиёти якмоҳаи «Ҷавонони Душанбе бар зидди СПИД мубориза мебаранд» бо дастгири намояндагии Созмони байналмилалии CARE INTERNATIONAL дар Тоҷикистон гузаронида шуд.