5 НАШРИЯ ДАР ЭРОН ТОҶИКИСТОНРО МУАРРИФӢ МЕКУНАНД

               Душанбе, 14 ноябр.(АМИТ «Ховар», Марзия Саидова).-5 ҳафтанома аз Тоҷикистон дар 15-умин намоишгоҳи байналмилалии матбуот ва хабаргузориҳо, ки аз 16-ум то 22-юми ноябр дар Теҳрон баргузор мегардад, иштирок менамоянд.              Намоишгоҳ бо ташаббуси Вазорати фарҳанг ва иршоди исломии Эрон ташкил карда шуда, дар он моли матбуот ва хабаргузориҳои 40 давлати ҷаҳон, хусусан кишварҳои минтақа ва Шарқи Наздик ба маърази тамошо гузошта мешаванд.                «Ҳадафи намоишгоҳ ба роҳ мондан ва тақвияти ҳамкорӣ миёни расонаҳои хабарӣ ва матбуоти кишварҳои минтақа мебошад»,- гуфт ба хабарнигори АМИТ «Ховар» масъули бахши матбуоти Сафорати Эрон дар Душанбе Алиризо Ороста.              Дар доираи баргузории намоишгоҳ иштирокчиён бо роҳбарони масъули сохтори марбутаи Эрон, сардабирони нашрияҳо, хабаргузориҳо ва Созмони садо ва симои ин кишвар дидору мулоқот намуда, бо фаъолияти матбуот ва хабаргузориҳо дар ин кишвар ошно мегарданд. Ҳамчунин, онҳо бо ёдгориҳои таърихии ин кишвар ва фаъолияти корхонаҳои саноатии он шинос мешаванд.