БА КОРМАНДОНИ ТЕАТР КӮМАКИ МОДДӢ РАСОНИДА ШУД

Душанбе, 7 ноябр (АМИТ «Ховар», Лутфия Эшонқулова). — Имрӯз, 7-ноябр  тамоми театрҳои ҷумҳурӣ иди касбияшонро қайд менамоянд. Аллакай аҳли ҳунари театрҳои пойтахт  дар театри драммавии ба номи Абулқосим Лоҳутӣ ҷамъ омада, ин рӯзро ботантана ҷашн гирифтанд. Дар ҷамъомади мазкур муовини аввали вазири фарҳанги ҷумҳурӣ Миралӣ Достиев иштирок намуда, аз номи роҳбарияти вазорат ҳозиринро бо Рӯзи театри тоҷик табрик гуфт ва ба онҳо парвози баланди эҷодӣ таманно намуд. «Имсол театрҳои ҷумҳурӣ дар бисьёр фестивалҳои байналмилалӣ иштирок намуда, муваффақият ба даст оварданд, ки ин нишонаи пешравист. Дар ҳақиқат имрӯзҳо сифати намоишномаҳо беҳтар гардидааст, ки он ба заҳмату талоши ҳунармандон вобаста аст», —  аз ҷумла қайд гардид дар сухани табрикотии муовини вазир.Мутобиқи фармони вазири фарҳанги Ҷумҳурии Тоҷикистон, барои заҳмати арзанда 14 нафар корманди театр  бо унвони «Нишони аълочии фарҳанги Ҷумҳурии Тоҷикистон» ва 15 нафар бо ифтихорномаи фахрӣ мукофотонида шуданд. Ба 50 нафари дигар кӯмаки моддӣ расонида шуд.   Дар хотима намоишномаи «Рӯдакӣ», ки аз рӯи асари Сотим Улуғзода рӯи саҳна омадааст, пешкаши тамошобинон гардид.