БАРНОМАИ НАВИ БАРГАРДОНИ ҲУРУФОТИ КИРИЛӢ БА ФОРСӢ

Душанбе, 27 ноябр. (АМИТ «Ховар», Бекназари Абӯбакр). — Донишмандони тоҷик барномаи компютерии баргардонандаи матни ҳуруфоти кирилӣ ба ҳуруфоти арабиасоси форсиро сохтанд. Ин барномаро донишмандони Пажӯҳишгоҳи математика ва Пажӯҳишгоҳи забон ва адабиёти Академияи илмҳои Тоҷикистон офаридаанд. Барномаи компютерӣ метавонад матни тоҷикӣ бо ҳуруфи крилиро бо дурустии 83 дар сад ба хатти форсӣ баргардонад. Беҳтар кардани баргардонии матни кирилӣ ба ҳуруфоти форсӣ аз роҳи ғанӣ кардани луғати барномаи компютерӣ ба даст меояд. Бахши назариявии он, яъне грамматика, шеваи баргардон, усулҳои инъикоси як матн дар матни дигар қариб пурра анҷом ёфтааст. Ба захираи луғавии барнома метавон шумораи зиёди калимаҳоро ворид кард, аз ҷумла калимаҳои арабиро, ки 15 дар сади захираҳои луғавии забони тоҷикиро ташкил медиҳанд. Хатоҳо ҳангоми баргардони матн дар он калимаҳое рух медиҳад, ки ба забони форсӣ дар Эрон аз забони англисӣ ва ба забони тоҷикӣ аз забони русӣ ворид шудаанд. Дар давоми ду-се моҳи оянда захираи луғавии барнома зиёд карда шуда, дақиқии баргардони он ба 95 фоиз хоҳад расид.