ДАВРИ ДУЮМИ АМАЛИЁТИ «КАНАЛ -2008» АНҶОМ ЁФТ

            Душанбе, 27 ноябр. (АМИТ «Ховар», Мавҷуда Давлатзода).- Дар қаламрави давлатҳои  аъзои Созмони аҳдномаи амнияти дастаҷамъӣ даври дуюми  амалиёти  «Канал — 2008» анҷом ёфт. Аз Тоҷикистон дар ин амалиёт ҷузъу томҳои Кумитаи давлатии  амнияти миллӣ, Вазорати корҳои дохилӣ ва Агентии  назорати маводи нашъадори назди Президенти ҷумҳурӣ ширкат варзиданд. Кормандони онҳо дар давоми  амалиёт 26 ҷинояти вобаста ба хариду фурӯши ғайриқонунии маводи нашъадорро  ошкор ва  пешгирӣ намуданд. Дар ин давра 184 килограму 290 грам маводи нашъадор мусодира карда шуд. Ғайр аз ин,  32 ҷиноят фош карда шуда, 3 мил аслиҳаи оташфишон ва як минаи танкшикан мусодира гардид.