«ДИДОР»-И АТО ҲАМДАМРО ДАР МАСКАВ ДИДАНДУ МО НАВ МЕБИНЕМ

        Душанбе, 20 ноябр. (АМИТ «Ховар», Лутфия Эшонқулова). –26- уми ноябр дар Иттифоқи нависандагони Тоҷикистон бахшида ба 60-умин солгарди зодрӯзи нависанда ва драматурги шинохта, барандаи Ҷоизаи олии адабии Покистон Ато Ҳамдам маҳфили адабӣ баргузор мегардад.         Тавре ба АМИТ «Ховар» дар Иттифоқи нависандагон хабар доданд, 60- солагии Ато Ҳамдам ба 45-солагии фаъолияти эҷодиаш рост омад ва ҷашн гирифтани ин ду санаро нависанда дар иҳотаи аҳли илму фарҳанги ҷумҳурӣ, ёру дӯстон ва хешу пайвандонаш ба нақша гирифтааст. Ҳамчунин, дар маҳфил китоби нави ӯ таҳти унвони «Дидор» муаррифӣ карда мешавад. Бояд зикр намуд, ки китоби мазкур аллакай дар озмуни байналхалқии «Ҳусни китоб», ки ба наздикӣ дар шаҳри Маскав доир гардида буд, ҷои 3-юмро ишғол карда, ҳаводорони худро пайдо намудааст.