ЭРОН ДАР ДУШАНБЕ МАКТАБИ ЗАМОНАВӢ МЕСОЗАД

        Душанбе, 4 ноябр. (АМИТ «Ховар», Марзия Саидова).-Вазорати омӯзиш ва парвариши Ҷумҳурии Исломии Эрон /ҶИЭ/ тасмим гирифтааст, ки дар шаҳри Душанбе мактаби таҳсилоти ҳамагонии наву замонавӣ бунёд созад. Ин иқдом дар асоси қарордоди ҳамкории Вазорати маорифи Ҷумҳурии Тоҷикистон бо Вазорати омӯзиш ва парвариши ҶИЭ амалӣ гардонида мешавад.         Сардори раёсати сохтмони Вазорати маорифи ҷумҳурӣ Хайриддин Шарифов дар сӯҳбат ба хабарнигори АМИТ «Ховар» гуфт, ки мактаби мазкур дар шаҳраки 92-юми Душанбе дар масоҳати 3 гектар барои 1200 нафар талаба сохта мешавад. Алҳол дар ин самт корҳои лоиҳакашӣ ба анҷом расонида шуда, он ба сохтори марбутаи мақомоти иҷроияи маҳаллии ҳокимияти давлатии шаҳри Душанбе пешниҳод карда шудааст.          Мактаби мазкур аз се ошёна иборат буда, дорои толорҳои гуногун, аз ҷумла варзишӣ ва ошхона мебошад.  Он бо усули меъмории муосири шарқӣ  бунёд карда мешавад. Ҳамзамон  дар шафаташ барои 500  нафар толибилмоне, ки аз минтақаҳои дурдасти ҷумҳурӣ дар он таҳсил хоҳанд кард, хобгоҳ сохта мешавад.