МАСОИЛИ ПЕШГИРИИ СӮИСТЕЪМОЛИ МАВОДИ НАШЪАДОР БАРРАСӢ КАРДА ШУД

Душанбе, 27 ноябр. (АМИТ «Ховар», Мавҷуда Давлатзода).- Имрӯз дар Агентии назорати маводи нашъаовари назди Президенти Ҷумҳурии Тоҷикистон ҷаласаи навбатии Шӯрои ҳамоҳангсозӣ оид ба пешгирии сӯистеъмоли маводи нашъадор бо иштироки муовини сарвазири ҶТ Руқия Қурбонова, муовинони директори Агентии мазкур Вайсиддин Азаматов, Бунафша Одинаева ва аъзои ин Шӯро баргузор гардид. Дар ҷаласа ҳисоботу ахбороти муовини вазири тандурустии Ҷумҳурии Тоҷикистон Соҳиб Раҳмонов оид ба иҷрои бандҳои дахлдори Барномаи ягонаи мақсадноки давлатӣ оид ба пешгирии нашъамандӣ ва муқобилият бо муомилоти ғайриқонунии маводи нашъаовар дар Ҷумҳурии Тоҷикистон барои солҳои 2008-2012 шунида шуд. Раиси Комиссияи минтақавии Шӯрои ҳамоҳангсозӣ Руҳулло Ҳакимов оид ба пешгирии  сӯистеъмоли маводи нашъадор, муовини директори Агентии назорати маводи нашъаовари назди Президенти Ҷумҳурии Тоҷикистон Бунафша Одинаева оид ба иҷрои бандҳои дахлдори Барномаи ягонаи мақсадноки давлатӣ оид ба пешгирии нашъамандӣ ва муқобилият бо муомилоти ғайриқонунии маводи нашъаовар дар ҶТ барои солҳои 2008-2012 сухан гуфтанд. Муовини аввали раиси Кумитаи кор бо ҷавонон, варзиш ва сайёҳии назди Ҳукумати Ҷумҳурии Тоҷикистон Кабирҷон Ҷӯраев оид ба иҷрои бандҳои 19, 22, 23 ва 27-и Нақшаи фаъолияти Шӯрои ҳамоҳангсозӣ оид ба пешгирии  сӯистеъмоли маводи нашъадор дар соли 2008 маълумот дод. Инчунин, дар ҷамъомад баррасии пешниҳодоти вазорату идораҳои дахлдор ба Нақшаи фаъолияти Шӯрои ҳамоҳангсозӣ оид ба пешгирии сӯистеъмоли маводи нашъадор дар соли 2009 баррасӣ карда шуд.