Н. ЖУСТЕН: «ПРЕЗИДЕНТИ ТОҶИКИСТОНРО БЕСАБРОНА ИНТИЗОРЕМ»

       Душанбе, 24 ноябр. (АМИТ «Ховар», Наргис Бойаҳмадова).- Имрӯз Президенти Ҷумҳурии Тоҷикистон Эмомалӣ Раҳмон роҳбари намояндагии Иттиҳоди Аврупо дар Тоҷикистон Норбер Жустенро ба ҳузур пазируфт. Н. Жустен ба Президенти Тоҷикистон эътиборнома супорид.        Меҳмон баъдан ба журналистон хабар дод, ки ҳамроҳи Президент масъалаҳои таҳкими муносибатҳои дуҷонибаро баррасӣ намудааст.        Вай зикр намуд, ки Иттиҳоди Аврупо Тоҷикистонро дар соҳаҳои сиёсию иқтисодӣ, беҳтар намудани шароити сармоягузорӣ ва рушди тиҷорат бо мамалакатҳои узви иттиҳод дастгирӣ мекунад. Иттиҳоди Аврупо айни ҳол дар Тоҷикистон силсилаи барномаҳоро амалӣ месозад. Зимни мулоқот масъалаи вазъияти Афғонистон низ муҳокима карда шуд. Н. Жустен дар фарҷоми сӯҳбат гуфт, ки «Мо бесаброна интизори ташрифи Президенти Тоҷикистон ба Брюссел мебошем».