НУРОВ УМЕД ДОРАД, КИ БА ХОНАНДА КӮМАК МЕРАСОНАД

Душанбе, 28 ноябр. (АМИТ «Ховар», Лутфия Эшонқулова). – Ба наздикӣ дар Душанбе китоби нав  бо номи «Масъалаҳои омӯзишу таҳқиқ ва рушди забони илмии тоҷикӣ» нашр гардид. Он  дар матбааи АИ ҶТ «Дониш» ба табъ расида, муаллифаш  забоншинос Пирмаҳмад Нуров мебошад. Дар монографияи мазкур таърихи ташаккулу такомули забони илмии тоҷикӣ, мушкилоти эҷод ва рушди минъбаъдаи  он, масъалаҳои назариявиву амалии забони адабиёти илмии техникии тоҷикӣ, аз ҷумла истилоҳоти илмии техникӣ мавриди таҳқиқу таҳлил қарор гирифта, роҳҳои татбиқи  забони тоҷикӣ дар соҳаи илмҳои дақиқ, табиатшиносӣ ва техникӣ, принсипҳои мураттабу якгунсозӣ  ва стандартигардонии истилоҳоти илмии техникӣ дар луғатномаҳои истилоҳот муайян карда шудаанд. Муаллиф умед дорад, ки рисола таҳқиқи минбаъдаи забони илмии тоҷикӣ ва истилоҳу истилоҳшиносиро дар забони тоҷикӣ ривоҷ бахшида, бо устодону донишҷӯён воситае барои омӯзонидану аз бар кардани назарияи забони илм ва истилоҳшиносӣ ва ба муаллифону мутарҷумони адабиёти илмиву дарсӣ дастуре барои сохтани истилоҳоти илмӣ ва техникӣ мегардад.