СОКИНИ СУҒД БО РОҲИ ФИРЕБ 344 ҲАЗОР ДОЛЛАРРО АЗ ХУД КАРД

Душанбе, 27 ноябр. (АМИТ «Ховар», Мавҷуда Давлатзода).- 25-уми ноябри соли 2008 Прокуратураи генералии Ҷумҳурии Тоҷикистон хулосаи айбдоркуниро бо айбдории Муҳаммадҷон Гадойбоев бо моддаи 347, қисми 4, банди «б»-и Кодекси ҷиноии Ҷумҳурии Тоҷикистон тасдиқ намуда, парвандаи ҷиноятиро барои моҳиятан дида баромадан ба Суди Олии ҷумҳурӣ ирсол намуд.Аз Прокуратураи генералии Ҷумҳурии Тоҷикистон ба мухбири АМИТ «Ховар» иттилоъ доданд, ки истиқоматкунандаи ноҳияи Бобоҷон Ғафурови вилояти Суғд М. Гадойбоев ба шаҳри Душанбе омада, дар кӯчаи Айнӣ, бинои 13 «в» ташкилоти «Маркази такмили байналмилалӣ» ва дар кӯчаи Ленин, бинои 42-и шаҳри Хуҷанди вилояти Суғд филиали ташкилоти номбаршударо таъсис дода, ҳамчун директори генералии он ба фаъолият шурӯъ намудааст. Ин корро ӯ ба воситаи шиносҳояш — шаҳрвандони ИМА бо номи Р. Кирева ва Е. Клинскалек анҷом додааст. Айбдоршуда аз моҳи декабри соли 2006 то 18-уми майи соли 2008 бо баҳонаи ба Донишгоҳи забономӯзии «Текио-Лорета»-и шаҳри Денвери штати Колорадои ИМА фиристодани шаҳрвандон, даст ба қаллобӣ- яъне ба тасарруфи амволи ғайр задааст. М. Гадойбоев дар ин давра аз 86 нафар шаҳрванд, истиқоматкунандагони шаҳри Душанбе, ноҳияҳои тобеи ҷумҳурӣ ва вилояти Суғд маблағи 344 ҳазор доллари ИМА-ро бо роҳи фиреб ва сӯистифодаи боварӣ гирифта, аз худ намудааст.