ТАШВИҚУ ТАРҒИБИ ТАРЗИ ҲАЁТИ СОЛИМ

          Душанбе, 28  ноябр. (АМИТ «Ховар»,  Наргис  Бояхмедова). – Аввали  моҳи  декабр  дар  Донишгоҳи  Славянии  Тоҷикистону  Русия таҳти  унвони  «Мо  ба  муқобили  маводи  нашъадор  мубориза  мебарем !» маъракаи  доманадор  баргузор  мегардад. Муовини  ректори  донишгоҳ  оид  ба  корҳои тарбиявӣ  Марина  Ковтун  ба  мухбири  АМИТ «Ховар»  хабар  дод, ки   дар  доираи  маъракаи  мазкур  дар  байни факултаҳои  донишгоҳ озмунҳои гуногун гузаронида  мешаванд. Донишҷӯён  инчунин  дар ин  мавзӯъ  маълумотномаҳо,  рӯзномаҳои  деворӣ ва  варақаҳо  тайёр  мекунанд, ки  тарзи  ҳаёти  солимро  ташвиқу  тарғиб  намуда,  дар  бораи  роҳу  усулҳои пешгирии  истеъмоли  маводи  нашъадор  маълумоти   зарурӣ  медиҳанд. М. Ковтун  афзуд, ки  чунин  маъракаҳо  мувофиқи  нақшаи  корӣ ҳар  сол  гузаронида  мешаванд. Дар  гузаронидани онҳо одатан  кумитаи  иттифоқи  касабаи донишҷӯён ва  донишҷӯёни  факултаи  журналистика саҳми  калон  мегузоранд. Омӯзгорони  донишгоҳ  ба  донишҷӯён  дар тайёр  намудани  маълумотномаҳо,  рӯзномаҳои  деворӣ, варақаҳо,  гузаронидани  сӯҳбату  мулоқотҳо  ва семинарҳо, конференсияҳо, консертҳо ва иҷрои  барномаҳои  маърифатӣ  кӯмак  мерасонанд.