ТОҶИКПИСАР ДАР ИСТАМБУЛ ДОНИШҶӮИ №1 АСТ

              Душанбе, 13 ноябр. (АМИТ «Ховар», Дилшода Ҷонмардова). — Зодаи ноҳияи Хуросони вилояти Хатлон Фаррух Воҳидов баъди хатми Литсейи муштараки иқтисодии тоҷикию туркии Тоҷикистон ба Истамбул рафт. Ӯ ба факултаи химияи Донишгоҳи ба номи Фотеҳи шаҳри Истамбул дохил шуда, бо ченаки аз ҳама баланди баҳо донишҷӯи №1 эътироф шуд.             Фаррух Воҳидов мегӯяд, ки дар Истамбул таҳсил кардан чандон душвор нест. Муаллимон мерасанд, синфхонаҳо ба талабот ҷавобгӯянд. Таъминот бо китоб ҳам хуб ба роҳ монда шудааст.             «Дар донишгоҳи мо таҳсил комилан пулакист. Музди солонаи таҳсил аз 7500 то 14000 доллари амрикоист, вале маблағи хониши маро худи донишгоҳ пардохт менамояд. Зеро ман дар супоридани имтиҳонҳо баҳои баландро сазовор гардидаам. Барои донишҷӯёни хориҷӣ ченаки муайяни баҳо вуҷуд дорад. Агар холи баландтар гиред, донишгоҳ кӯмаки 50 ё садфоиза мерасонад. Яъне, дар сурати баҳравар шудан аз кӯмаки садфоиза донишҷӯ аз супоридани маблағи таҳсил пурра озод мешавад. Алҳол ман ҳамин имтиёзро дорам»,- мегӯяд ӯ.             Бояд зикр намуд, ки дар шумораи тозанашри ҳафтаномаи «Ҷавонони Тоҷикистон» мусоҳибаи хондание бо Фаррух Воҳидов ба табъ расидааст.