ҚОНУНИГАРДОНИИ МОЛУ МУЛК ЧӢ ГУНА ҶАРАЁН ДОРАД?

         Душанбе, 24 декбар. (АМИТ «Ховар», Марзия Саидова).- «То имрӯз молу мулки беш аз 1900 нафар шаҳрванд ва шахсони ҳуқуқии ноҳияи Исмоили Сомонии пойтахт қонунӣ гардонида шудааст». Чунини гуфт дар сӯҳбат ба хабарнигори АМИТ «Ховар» котиби масъули Комиссияи қонунигардонии молу мулки ноҳияи мазкур Исматулло Зиёев.         Мавсуф зикр кард, ки вобаста ба қонунигардонии молу мулк ба Комиссия, ки дар бинои мақомоти иҷрояи ҳокимияти давлатии ноҳия фаъолият менамояд, 3800 аризаи шаҳрвандон ворид гардидааст. Аз он 30 адад муроҷиат рад карда шуда, 1870 ададаш мавриди баррасии аъзои Комиссия қарор дорад. Бояд зикр кард, ки тибқи Қонуни Ҷумҳурии Тоҷикистон «Дар бораи авфи шаҳрвандон ва шахсони ҳуқуқии Ҷумҳурии Тоҷикистон бинобар қонунигардонии молу мулк» тамоми амволи ғайриманқул — хона, автомашина, сангҳои қимматбаҳо, коғазҳои қимматбаҳо, ширкату корхонаҳои хусусӣ қонунӣ гардонида мешаванд.           Қонуни мазкур ҳанӯз моҳи майи соли 2007 қабул карда шуда буд. Ба он 23-юми декабри соли равон  бо пешниҳоди Президенти ҷумҳурӣ Эмомалӣ Раҳмон дар иҷлосияи 5-уми палатаи поёнии парлумони Тоҷикистон тағйирот ворид карда шуд. Тибқи он мӯҳлати қонунигардонии молу мулк дар ҷумҳурӣ  6 моҳ тамдид гардид. Бояд зикр намуд, ки шаҳрвандон ва шахсони ҳуқуқии Тоҷикистон имкон доранд то 1-уми июли соли 2009 молу мулки худро қонунӣ гардонанд.