БАРРАСИИ МАСЪАЛАҲОИ ҲАМКОРӢ

         Душанбе,  24  декабр. (АМИТ «Ховар»,  Мавҷуда  Давлатзода).  —  Имрӯз  зимни  мулоқоти  директори  Агентии  назорати  маводи  нашъадори  назди  Президенти  ҷумҳурӣ  Рустам  Назаров  бо  директори Маркази минтақавии иттилоотию ҳамоҳангсозии   тадбирҳои  мубориза  ба  муқобили   хариду   фурӯши  ғайриқонунии  маводи  нашъадори Осиёи  Марказӣ Бексултон  Сарсаков   масъалаҳои  ривоҷ  додани   ҳамкорӣ  мавриди  муҳокима  қарор  дода  шуданд. Ҳар  ду  ҷониб  паймон  карданд, ки  барои  пешгирии  ин  зуҳуроти  номатлуб   амалиёти  муштараки  байналхалқӣ  гузаронанд. Ҳамчунин  масъалаи  интихоби  кормандони  марказ   аз  ҷумлаи  кормандони  варзидаи   мақомоти  дахлдори  давлатҳои  минтақа  баррасӣ  карда  шуд.        Мухбири  АМИТ «Ховар»  хабар  медиҳад, ки  Б. Сарсаков   ин  масъалаҳоро  дар  ҷараёни  мулоқот  бо  роҳбарони  Шӯъбаи  мудофиа  ва   тартиботи  қонунии  Дастгоҳи  иҷроияи  Президенти  ҷумҳурӣ,  Вазорати корҳои дохилӣ,  Кумитаи   давлатии  амнияти  миллӣ ва Хадамоти  гумруки   назди  Ҳукумати  мамлакат   баррасӣ  хоҳад  кард.